హర్దా బాణాసంచా పేలుడు.. 11మంది మృతి, 217 మందికి గాయాలు

ఇండోర్​: మధ్యప్రదేశ్​​ లోని హర్దాలో బుధవారం బాణాసంచా ఫ్యాక్టరీలో సంభవించిన పేలుడులో 11 మంది గాయపడగా 51 మంది కార్మికులు సహా మొత్తం 217 మందికి గాయాలైనట్లు అధికార వర్గాలు గురువారం మీడియాకు వివరించాయి. గాయపడిన 73 మందిని హర్ధా, ఇండోర్​, భోపాల్​, నర్మదాపూర్​ ఆసుపత్రుల్లో చికిత్స పొందుతుండగా, మరో 38 మంది హర్ధాలోని ఆసుపత్రిలో చికిత్స పొందుతున్నారు. 95 మంది స్వల్ప గాయాలకు చికిత్సనందించి డిశ్చార్జీ చేసినట్లు తెలిపారు.

బాణాసంచా ఫ్యాక్టరీలో అండర్​ గ్రౌండ్​ లో భారీగా గన్​ పౌడర్​ నిల్వ ఉండడంతో పేలుడు తీవ్రత ఎక్కువగా ఉన్నట్లు వివరించారు. అక్కడే కార్మికులు కూడా పనిచేస్తుండడంతో పేలుడు ప్రాణనష్టం ఎక్కువగా వాటిల్లినట్లు అధికారులు పేర్కొన్నారు.

స్థానికుల ఆరోపణలు.. సీఎం సీరియస్​..
కాగా అనేకమార్లు స్థానికంగా బాణాసంచా వల్ల పలు ఇబ్బందులు ఎదుర్కొంటున్నామని స్థానికులు ఫిర్యాదు చేసినప్పటికీ అధికారులు పట్టించుకోలేదనే వార్తల నేపథ్యంలో సీఎం మోహన్​ యాదవ్​ సీరియస్​ అయ్యారు. ఘటనపై సమగ్ర విచారణ జరిపి వెంటనే నివేదిక అందజేయాలని కలెక్టర్​ కు ఆదేశాలు జారీ చేశారు. మృతుల కుటుంబాలకు రూ. 4 లక్షల పరిహారం ప్రకటించి, క్షతగాత్రులకయ్యే చికిత్స ఖర్చంతా ప్రభుత్వమే భరిస్తుందని స్పష్టం చేశారు. మరోమారు ఇటువంటి ఘటనలు పునరావృతం కాకుండా గట్టి చర్యలు చేపడతామన్నారు.