పోలీసు స్టేషన్ లో చోరుల హస్తలాఘవం
మత్తు నిద్దురలో పోలీసులు!
రెండు వాహనాలు, ఫోన్లు ఎత్తుకెళ్లిన దొంగలు
బూర్గంపాడు పోలీస్ స్టేషన్ లో ఘటన
ఎస్పీ హెచ్చరించిన సిబ్బందిలో రాని మార్పు
విషయం బయటకు పొక్కనీయకుండా జాగ్రత్తలు
భద్రాద్రి కొత్తగూడెం: చోరులు పోలీసులకే సవాల్ విసిరారు. ఒక్కసారి కాదు ఏకంగా రెండుసార్లు దర్జాగా పోలీస్ స్టేషన్ ఆవరణలోకి, స్టేషన్ లోకి చొరబడి ద్విచక్ర వాహనం, డ్యూటీలో ఉన్న పోలీసుల మొబైల్ ఫోన్లు చోరీ చేసి షాక్ ఇచ్చారు. ఈ విషయం ఆలస్యంగా వెలుగులోకొచ్చింది. బయటికి చెప్పుకుంటే పరువు పోతుందనే ఉద్దేశ్యంతో పోలీసులు ఈ విషయాన్ని బయట పెట్టకపోవడం కొసమెరుపు.
వివరాల్లోకి వెళితే.. భద్రాద్రి కొత్తగూడెం జిల్లా బూర్గంపాడు పోలీస్ స్టేషన్ ఆవరణ పార్కింగ్ లో ఉన్న ద్విచక్ర వాహనాన్ని ఇద్దరు గుర్తుతెలియని వ్యక్తులు ఎత్తుకెళ్లినట్లుగా తెలుస్తుంది? మరుసటి రోజే మళ్లీ వచ్చిన యువకులు మరో ద్విచక్ర వాహనాన్ని, డ్యూటీలో ఉండగా నిద్దురలో జారుకున్న కానిస్టేబుల్స్ మొబైల్ ఫోన్లను చోరీ చేసినట్లుగా తెలుస్తోంది. ఈ దొంగతనాల విషయం బయటికి పొక్కనీయకుండా పోలీసులు జాగ్రత్తలు తీసుకుంటుండటం విశేషం.
బూర్గంపాడు పోలీస్ స్టేషన్ లోని విధులు నిర్వహిస్తున్న పోలీసుల వ్యవహారం కాస్త ఎస్పీ రోహిత్ రాజ్ కు తలనొప్పిగా మారింది. సిబ్బంది పనితీరుపై పలుమార్లు ఆయన హెచ్చరికలు జారీ చేసినా పెడచెవిన పెట్టారు. దీంతో పలువురు సిబ్బందిని విధుల నుంచి ఇతర చోట్లకు మార్చారు కూడా. అయినా ఈ స్టేషన్ పోలీసుల్లో మార్పు రానట్లు కనబడుతోంది.
ఇంత దర్జాగా రాత్రివేళ వచ్చి ఏకంగా స్టేషన్ లోకి వచ్చివాహనాలు, పోలీసుల ఫోన్లు సైతం ఎత్తుకెళుతుండగా పోలీసులు ఏం చేస్తున్నట్లో వారికే తెలియాలి?ఈ స్టేషన్ లోని సిబ్బందిపై మరో ఆరోపణ కూడా ఉంది. రాత్రివేళ మద్యం సేవించి విధులకు హాజరవుతారన్న అపవాదు ఉంది. ఇదే నేపథ్యంలో వారు నిద్ధుర పోతుంటే చోరులు తమ హస్తలాఘవాన్ని ఏకంగా స్టేషన్ పైనే ప్రయోగించి సత్తా చాటుకోవడం విశేషం.
