యూపీలో మరో తెగదెంపులు? సీట్ల పంచాయతీపై ఎస్పీ గుర్రు రిక్త‘హస్తా’నికి సిద్ధం

లక్నో: ఇండి కూటమిలోని ప్రధాన పార్టీ కాంగ్రెస్​, ఎస్పీ (సమాజ్​ వాదీ పార్టీ)ల మధ్య సీట్ల పంచాయతీ కొలిక్కి రాకపోవడంతో  అఖిలేశ్​ యాదవ్​ తెగదెంపుల దిశగా పయనిస్తున్నట్లు సమాచారం. యూపీలో సింగిల్​ గానే రంగంలోకి దిగే ఆలోచనలో ఉన్నారు. దీంతో హస్తానికి మరోమారు యూపీలోనూ ఎస్పీ రిక్తహస్తాన్నే అందజేయనుంది. సోమవారం అర్థరాత్రి వరకు సీట్ల పంపకాలపై చర్చలు జరిగినా ఓ కొలిక్కి రానట్లుగా తెలుస్తోంది. మరోవైపు ఎస్పీ పార్టీ నిర్ణయాన్ని విబేధిస్తూ, పార్టీ తీరుపై గుర్రుగా ఉన్న ప్రధాన నేత స్వామి ప్రసాద్​ మౌర పార్టీకి, ఎమ్మెల్సీ పదవికి రాజీనామా చేసిన విషయం తెలిసిందే.

కాగా కాంగ్రెస్​ పార్టీ 17 ఎంపీ సీట్లను యూపీలో కోరుతోంది. మొరాదాబాద్​, సహారన్​పూర్​, బిజ్నోర్​, మీరట్​, అమ్రోహా, లక్నో స్థానాలను కాంగ్రెస్​ కోరుతోంది. ఈ స్థానాల్లో మంచి పోటీనివ్వగలమని ఎస్పీ భావిస్తోంది. పై అన్ని స్థానాల్లో నుంచి కేవలం మొరాబాదాద్​ స్థానం నుంచే ఎస్పీ గెలుపొందినా, గత అభ్యర్థుల ట్రాక్​ రికార్డు భేషుగ్గా ఉందని ప్రజలు మొగ్గు చూపే అవకాశం లేకపోలేదని వాదిస్తోంది. మీరట్​, లక్నోలో బీజేపీ గత ఎన్నికల్లో విజయఢంకా మోగించింది. 

కాంగ్రెస్​ పార్టీ పదేపదే జాబితా మారుస్తుండడం తమ అభ్యర్థులకు చెప్పుకోలేక తలకుమించిన భారమవుతోందని ఎస్పీ పార్టీ ఆవేదన వ్యక్తం చేస్తోంది. 

ఈ నేపథ్యంలో రాహుల్​ గాంధీ యూపీ భారత్​ జోడో యాత్ర కంటే ముందే ఇండికూటమికి మరోమారు బీటలు ఖాయమనే వాదనలు వినిపిస్తున్నాయి. మరోవైపు కాంగ్రెస్​ తలపెట్టిన భారత్​ జోడో యాత్రలో తాను పాల్గొనబోనని అఖిలేశ్​ యాదవ్​ స్పష్టం చేయడం కూడా ఇండికూటమి నుంచి వైదొలిగే సంకేతాలే కనిపిస్తున్నాయి