మారిషస్ కు చాగోస్ ఇచ్చేస్తాం
బ్రిటన్ ప్రకటన అర్థశతాబ్దం వివాదం సమసినట్లే
లండన్: మారిషస్ కు హిందూ మహాసముద్రంలోని ‘చాగోస్’ ద్వీపాన్ని తిరిగి ఇచ్చేయనున్నట్లు గురువారం బ్రిటన్ విదేశాంగ కార్యదర్శి డేవిడ్ లామీ ప్రకటించారు. దీంతో ఇరుదేశాల మధ్య అర్థశతాబ్దంగా ఉన్న ఈ వివాదం కాస్త ముగిసినట్లయ్యింది. ఈ వివాదంపై ఇరుదేశాలు ఒక ఒప్పందానికి వచ్చాయి. ఒప్పందం ప్రకారం చాగోస్ దీవుల సార్వభౌమాధికారాన్ని మారిషస్ కు అప్పగిస్తామని బ్రిటన్ స్పష్టం చేసింది. ద్వీపంలో ఉన్న బ్రిటన్ ప్రజలు స్వదేశానికి రాదలుచుకుంటే రావచ్చని పేర్కొంది. అదే సమయంలో అక్కడ ఉన్న సైనిక స్థావరాన్ని మాత్రం కొనసాగిస్తామని పేర్కొంది. హిందూ మహాసముద్రంలో యూకె, యూఎస్ లు నిర్వహిస్తున్న అత్యంత ప్రతిష్ఠాత్మకమైన సైనిక స్థావరం ఇది. ఈ స్థావరం అప్పగింతపై గతంలో భారత్ తన పూర్తిమద్దతును మారిషస్ కు ప్రకటించింది.
చాగోస్ ద్వీపసమూహం మధ్య హిందూ మహాసముద్రంలో ఉన్న సుమారు 58 చిన్న దీవుల సమూహం. చారిత్రాత్మకంగా, ఈ ద్వీపసమూహం మారిషస్‌పై ఆధారపడే ప్రాంతం. 1814లో పారిస్ ఒప్పందం ప్రకారం యూకెకి ఈ ద్వీపం లభించింది. 1968లో మారిషస్ కు స్వాతంత్ర్యం లభించింది. అప్పటి నుంచి ఈ దీవుల అప్పగింత వివాదం కొనసాగుతోంది.
