ఆర్బీఐ నూతన గవర్నర్ గా సంజయ్​ మల్హోత్రా

కేంద్ర కేబినెట్​ ఉత్తర్వులు జారీ
డిసెంబర్​ 11న ప్రమాణ స్వీకారం
మంగళవారంతో ముగియనున్న శక్తికాంతదాస్​ పదవీకాలం

నా తెలంగాణ, న్యూ ఢిల్లీ: ఆర్బీఐ నూతన గవర్నర్​ గా సంజయ్​ మల్హోత్రాను నియమిస్తూ కేంద్ర ప్రభుత్వం నిర్ణయం తీసుకుంది. ఈ మేరకు కేంద్ర కేబినెట్​ తీసుకున్న నిర్ణయంపై కేబినెట్​ సెక్రెటరీ మనీషా సక్సెనా సోమవారం ఉత్తర్వులు జారీ చేశారు. 11వ తేదీన సంజయ్​ మల్హోత్రా ప్రమాణ స్వీకారం చేపట్టనున్నారు. ఆర్బీఐ గవర్నర్​ శక్తికాంత దాస్​ పదవీకాలం మంగళవారంతో ముగియనుంది. ఈ నేపథ్యంలో కేంద్రం సంజయ్​ మల్హోత్రాను నూతన గవర్నర్​ గా నియమించింది. రెవెన్యూ కార్యదర్శిగా ఉన్న సంజయ్​ మల్హోత్రా మూడేళ్లపాటు ఆర్బీఐ గవర్నర్​ గా పదవిలో కొనసాగనున్నారు. మల్హోత్రా ఆర్బీకి 26వ గవర్నర్​ గా విధులు చేపట్టనున్నారు. 

కాగా సంజయ్​ మల్హోత్రా ప్రధాని మోదీ ప్రశంసలు పొందుతున్న వారిలో ఒకరు. ఆర్థిక విషయాలలో ఈయన బలమైన విధానాలను పలుమార్లు ప్రధాని ప్రశంసించారు. మల్హోత్రా తొలుత రాజస్థాన్​ లో అన్ని విభాగాల్లో పనిచేశారు. అటు పిమ్మట కేంద్ర ఆర్థిక శాఖకు వచ్చారు. ఏదైనా ఆర్థిక సమస్యను పరిష్కరించడంలో సిద్ధహస్థుడిగా ఈయన పేరు పొందారు. 

శక్తికాంత దాస్ 2018, డిసెంబర్​12న గవర్నర్‌గా నియమితులయ్యారు. ఆ తర్వాత శక్తికాంత దాస్ పదవీకాలాన్ని మరో మూడేళ్లపాటు పొడిగించారు. దాస్​ హయాంలో గణనీయమైన వృద్ధికి పునాదులు వేయగలిగారు. కేంద్రం ఆకాంక్షలను నెరవేర్చారు.