అదానీపై ఆరోపణలు సరికాదు అమెరికాకు నష్టమే

మాజీ ఐక్యరాజ్యసమితి పర్యావరణ మంత్రి ఎరిక్​ సోల్హీమ్​
ప్రపంచదేశాల్లో గ్రీనరీని పెంపొందించేందుకు చర్యలు

నా తెలంగాణ, న్యూ ఢిల్లీ: అదానీ గ్రూప్​ పై అమెరికా జస్టిస్​ ఆరోపణలు ఆ సంస్థను మరింత బలోపేతం చేశాయని నార్వే మాజీ ఐక్యరాజ్యసమితి పర్యావరణ మంత్రి ఎరిక్​ సోల్హీమ్​ అన్నారు. శనివారం ఆయన మీడియాతో తన అభిప్రాయాలను పంచుకున్నారు. అమెరికాకు ఈ విషయంలో ఏవైనా ఫిర్యాదులుంటే తొలుత భారత ప్రభుత్వంతో, అక్కడి న్యాయవ్యవస్థ ప్రకారం నడుచుకోవాల్సి ఉండేదన్నారు. కానీ అమెరికా అలా చేయకపోవడం దురదృష్టకరమన్నారు. అదానీ గ్రూప్​ పై అమెరికా కోర్టు ఆరోపణలు సరికాదన్నారు. ప్రపంచ గ్రీనరీ, పర్యావరణ పెంపుదలలో ఆ సంస్థ కీలకంగా వ్యవహరిస్తున్న విషయాన్ని మరిచిపోవద్దన్నారు. యూఎస్​ గ్రీనరీ ఎంత హానికరమైన పరిస్థితుల్లో ఉందో ముందుగా తెలుసుకోవాలన్నారు. 

యూఎస్​ లో 10 బిలియన్​ డాలర్ల పెట్టుబడులు, 15వేల ఉద్యోగాలు..
అదానీ గ్రూపు పర్యావరణ పరిరక్షణే ధ్యేయంగా సులువైన, శ్రేయస్కరమైన మార్గాల ద్వారా వ్యాపార, వాణిజ్యాలు, ప్రణాళికలు రూపొందిస్తుందన్నారు. ప్రపంచంలోని అనేక దేశాల్లో ఈ సంస్థ పర్యావరణానికి హాని కలిగించని విధంగా వ్యాపారాన్ని విస్తరించుకోవడం హర్షించాల్సింది పోయి ఆరోపణలు చేయడం సరికాదన్నారు. అంతేగాక యూఎస్​ ఇంధన భద్రతా కార్యక్రమాలకు 10 బిలియన్​ డాలర్ల పెట్టుబడిని కూడా ప్రకటించిన విషయాన్ని ఎరిక్​ సోల్హీమ్​ గుర్తు చేశారు. అదానీ గ్రూప్​ అమెరికా ఎనర్జీ సెక్యూరిటీ, ఇన్‌ఫ్రాస్ట్రక్చర్ ప్రాజెక్టులలో 10 బిలియన్ డాలర్ల పెట్టుబడి పెట్టడానికి కట్టుబడి ఉంది. దీని ద్వారా 15,000 స్థానిక ఉద్యోగాలు కూడా లభించనున్నాయని తెలిపారు. 

శాసించే రోజులు గతమే..
ఈ పరిణామాలను పరిగణనలోకి తీసుకోకుండా అమెరికా తన నిరంకుశ విధానాన్ని ఇప్పటికైనా మార్చుకుంటే మంచిదన్నారు. అమెరికా అర్థరహిత చర్యల పర్యవసానాలు ఆ దేశానికి కూడా విఘాతమే కల్పిస్తాయన్న విషయాన్ని మరువరాదన్నారు. అమెరికా ప్రపంచదేశాలను శాసించే, మధ్యవర్తులు, న్యాయ నిర్ణేతలుగా నిర్ణయించే కాలం గతమేనని, ప్రస్తుతం కాదన్నారు. అదానీ గ్రూప్​ పై ఆరోపణలు చేసిన యూఎస్​ అటర్నీ బ్రియాన్​ పీస్​ రాజీనామాతో అమెరికా చేసింది తప్పేనని స్పష్టం అవుతుందన్నారు.