కువైట్​ కు వెలుగులు తీసుకువచ్చారు

ప్రవాస భారతీయుల పనితీరుపై ప్రధాని నరేంద్ర మోదీ హర్షం

అల్ అసిమా గవర్నేట్: ప్రవాస భారతీయులు కువైట్​ కు రంగులను తీసుకువచ్చారని, ఈ దేశంలో భారత సాంకేతికత, విజ్ఞానాన్ని మిళితం చేస్తూ అభివృద్ధికి పాటుపడటం దేశానికి గర్వకారణమని ప్రధాని నరేంద్ర మోదీ అన్నారు. ప్రపంచదేశాల్లో భారత్​ ఎకానమీలో అతిపెద్ద భాగస్వామ్యాన్ని పోషించబోతుందన్నారు. ప్రతీ రంగంలోని పెద్ద పెద్ద సంస్థలు, పరిశ్రమలు, హబ్​ లు భారత్​ లో నెలకొంటున్నాయని తెలిపారు. 
శనివారం కువైట్​ పర్యటనలో ప్రవాస భారతీయులను ఉద్దేశించి ప్రధాని మోదీ ప్రసంగించారు. భారత్​–కువైట్​ నాగరికతలు సముద్రమంతా లోతైనవన్నారు. కువైట్​ లో ప్రవాసీయులు మినీ ఇండియానే సృష్టించుకున్నారని హర్షం వ్యక్తం చేశారు. తాను భారతీయులు సాధించిన విజయాలను జరుపుకునేందుకు కువైట్​ కు వచ్చానని అన్నారు. కార్మికులు, వైద్యులు, నర్సులు, ఉపాధ్యాయులు, ఇంజనీర్లు ఇలా అనేకమంది ప్రవాస భారతీయులు కువైట్​ మౌలిక సదుపాయాల కల్పనలో అత్యంత కీలకంగా వ్యవహరిస్తూ భారతదేశ సత్తా చాటుతున్నారని ప్రశంసించారు. మీ కృషి, నిజాయితీ, సమర్థతను కువైట్​ ప్రజలు, తాను, భారత్​ ఎంతో గౌరవిస్తుందని స్పష్టం చేశారు. ప్రవాస భారతీయులు ఇతర దేశాల అభివృద్ధిలో భాగస్వాములవడం నేడు ప్రపంచదేశాలన్నీ చూస్తున్నాయన్నారు. మన గతం, వర్తమానం, భవిష్యత్​ కూడా ప్రపంచదేశాలు హర్షించే విధంగా ఉన్నాయన్నారు. కువైట్​ నుంచి భారత్​ కు గుర్రాలు, ముత్యాలు, ఖర్జురాలు దిగుమతి అవుతుండగా, భారత్​ నుంచి కువైట్​ కు బియ్యం, టీ, సుగంధ ద్రవ్యాలు, బట్టలు, కలప దిగుమతి అవుతున్నాయన్నారు. ఇరుదేశాల మధ్య వ్యాపార వాణిజ్య బంధాలు లోతైనవని ప్రధాని నరేంద్ర మోదీ స్పష్టం చేశారు.