MODI: రేపు తెలంగాణకు ప్రధాని
Prime Minister Narendra Modi will visit Telangana tomorrow
- పది రోజుల్లో రాష్ట్రానికి రెండోసారి రాక
- మెజార్టీ సీట్లు సాధించడమే లక్ష్యంగా పర్యటన
- ఇప్పటికే రూ.82 వేల కోట్ల పనులకు శ్రీకారం
- మరిన్ని ప్రాజెక్టులను ప్రారంభించనున్న ప్రధాని
- మల్కాజిగిరిలో రోడ్ షో.. నాగర్ కర్నూల్ లో బహిరంగ సభ
- ఏర్పాట్లు పూర్తి చేస్తున్న బీజేపీ రాష్ట్ర నాయకత్వం
- మోదీ సమక్షంలో కమలం పార్టీలో మరిన్ని చేరికలు!
నా తెలంగాణ, హైదరాబాద్: పది రోజుల వ్యవధిలోనే ప్రధాని నరేంద్ర మోదీ రెండోసారి తెలంగాణకు రాబోతున్నారు. శుక్ర, శని వారాల్లో రాష్ట్రంలో పర్యటించనున్న మోదీ.. రోడ్ షోలతోపాటు బహిరంగ సభల్లో పాల్గొననున్నారు. ఈ మేరకు ప్రధాని షెడ్యూల్ ఖరారైంది. బీజేపీ రాష్ట్ర నాయకత్వం మోదీ రోడ్ షో, సభలకు అన్ని ఏర్పాట్లు చేస్తున్నారు.
ఇదీ షెడ్యూల్
మార్చి 15న సాయంత్రం 4.50 గంటలకు ప్రధాని మోదీ బేగంపేట విమానాశ్రయానికి చేరుకుంటారు. 5.15 గంటల నుంచి 6.15 గంటల వరకు రోడ్ షోలో పాల్గొంటారు. 6.40 నిమిషాలకు సోమాజీగూడలో రాజ్ భవన్ కు చేరుకుంటారు. అనంతరం పలువురు ప్రముఖులను అక్కడే కలుసుకుంటారు. రాత్రి రాజ్ భవన్ లోనే బస చేసి..16వ తేదీన ఉదయం 10.45 గంటలకు రాజ్ భవన్ నుంచి11 గంటలకు బేగంపేట విమానాశ్రయానికి చేరుకుంటారు. అక్కడి నుంచి 11 గంటల 55 నిమిషాలకు నాగర్ కర్నూల్ చేరుకొని మధ్యాహ్నం12 గంటలకు జరిగే బహిరంగ సభలో ప్రధాని పాల్గొంటారు. మధ్యాహ్నం ఒంటిగంటకు నాగర్ కర్నూల్ నుంచి గుల్బర్గా పర్యటనకు బయలుదేరుతారు.
మరిన్ని చేరికలు?
ప్రధాని మోదీ పర్యటనతో రాష్ట్రంలో బీజేపీ రోజు రోజుకు పుంజుకుంటున్నది. అటు బీఆర్ఎస్, ఇటు కాంగ్రెస్ పార్టీల నుంచి పలువురు నాయకులు కమలం పార్టీలో చేరుతున్నారు. బీజేపీ అధిష్టానం కూడా ఈసారి తెలంగాణలో మెజార్టీ సీట్లు సాధించడమే లక్ష్యంగా బలమైన అభ్యర్థులను బరిలోకి దింపుతున్నది. ఈ మేరకు ఇప్పటికే రెండు జాబితాల్లో 15 స్థానాల్లో అభ్యర్థులను ప్రకటించింది. ఖమ్మం, వరంగల్ స్థానాల్లో కూడా బలమైన అభ్యర్థులను పెట్టాలని భావిస్తున్నది. ప్రధాని మోదీ తెలంగాణ రెండు రోజుల పర్యటనలో పలువురు నాయకులు కమలం పార్టీలో చేరబోతున్నట్లు తెలుస్తున్నది.
