మూడోసారి ప్రధాని మోదీ ఖాయం దేశాభివృద్ధికి సంస్కరణలు కొనసాగిస్తాం

నా తెలంగాణ, న్యూఢిల్లీ: మూడోసారి కూడా ప్రధానమంత్రి నరేంద్ర మోదీ అధికారం చేపట్టడం ఖాయమని, దేశాభివృద్ధి కోసం ఆయన చేపడుతున్న సంస్కరణలు కొనసాగుతాయని ఆర్థిక శాఖ మంత్రి నిర్మలా సీతారామన్​ అన్నారు. మంగళవారం ఫిక్కీ (ఫెడరేషన్ ఆఫ్ ఇండియన్ ఛాంబర్స్ ఆఫ్ కామర్స్ అండ్ ఇండస్ట్రీ) నిర్వహించిన ‘డెవలప్​ ఇండియా @ 2047’లో ఆమె పాల్గొని ప్రసంగించారు. దేశవ్యాప్తంగా పరిశ్రమల ప్రోత్సాహానికి కేంద్ర ప్రభుత్వం అనేక చర్యలు తీసుకుంటుందన్నారు. 2047 వరకు ప్రపంచంలోనే ఆర్థికంగా తొలిస్థానంలో భారత్​ ఉండాలనే లక్ష్యంతో కేంద్రం ముందుకు వెళుతోందన్నారు. ఏప్రిల్​–మేలో సార్వత్రిక ఎన్నికలు జరుగుతాయని ఎన్నికల అనంతరం ప్రధాని మోదీ కొనసాగిస్తున్న సంస్కరణలకు మరింత పదునెక్కిస్తారని మంత్రి నిర్మలమ్మ పేర్కొన్నారు.

ప్రస్తుత కాలంలో డిజిటల్​ మాధ్యమం ద్వారా దేశ వృద్ధి సాధ్యమన్నారు. ఇది లేకుండా ఏ దేశమూ ప్రగతి సాధించలేదని స్పష్టం చేశారు. ఏఐ ఇన్నోవేషన్​ రంగంలో పెట్టుబడులకు ప్రోత్సాహం లభిస్తుందని నిర్మలమ్మ పేర్కొన్నారు. అంతరిక్ష రంగంలో కూడా భారత్​ ప్రపంచంలోనే మంచి స్థానంలో ఉందన్నారు. గత ప్రభుత్వాల హయాంలో భారత్​ ఆర్థిక రంగంలో 10వ స్థానంలో ఉండేదని గుర్తు చేశారు. 2014 తరువాత ప్రధాని మోదీ చేపట్టిన కీలక సంస్కరణల వల్ల ఐదో స్థానానికి చేరుకుంటుందని అతి త్వరలో ఈ స్థానం మరింత మెరుగుపడి మూడుకు చేరుకుంటుందన్న విశ్వాసాన్ని ఆర్థిక శాఖ మంత్రి నిర్మలా సీతారామన్​ వ్యక్తం చేశారు.