ఉగ్రపంథాకు చెక్​  మరోమారు సర్జికల్​ స్ట్రైక్​​ దాడులకు సిద్ధం

• పీర్​ పంజాల్​, అటవీలో భారీ బంకర్లు
• అందులోనే ఆయుధ డంప్​
• దాడుల తర్వాత బంకర్లలోనే షెల్టర్​
• పాక్​, చైనాల పూర్తి సహాయం
• భారీ ఆపరేషన్​ కు భారత్​ సిద్ధం
• 
  నా తెలంగాణ, సెంట్రల్​ డెస్క్​: జమ్మూకశ్మీర్​ లో ఉగ్రదాడులు పెరిగాయి. స్థానిక గైడ్​ ల సహాయంతో ఉగ్రవాదులు భద్రతా బలగాలపై దాడులను పెంచుతున్నారు. అదే సమయంలో ఉగ్రవేటను పటిష్ఠంగా నిర్వహిస్తున్న భారత బలగాలకు చిక్కకుండా పారిపోతున్నారు. దీని వెనుక ఉన్న అసలు కారణాలను భారత ఇంటలిజెన్స్​ వర్గాలు పూర్తిగా పసిగట్టి కేంద్ర, ఆర్మీ వర్గాలకు సమాచారం అందించాయి. ప్రస్తుతం దీనికి విరుగుడు ఆపరేషన్​ ను కూడా కనుగొన్నట్లు సమాచారం. 

జమ్మూ నుంచి కాశ్మీర్​ కు మకాం మార్చుకున్న ఉగ్రవాదులు ఇక్కడ దాడులకు తెగబడుతూ సవాల్​ విసురుతున్నారు. వీరికి పాక్​,చైనా సహాయ సహకారాలు అందుతున్నాయి. అదే సమయంలో పీర్​ పంజాల్​ పర్వత పంక్తులపై పలు లోతైన బంకర్లను నియమించుకొని అక్కడే ఆయుధాలను కూడా డంప్​ చేశారు. ఆ ప్రాంతం నుంచి భారత్​ లోకి సొరంగాల ద్వారా అటవీ ప్రాంతంలోకి ప్రవేశిస్తున్నారు. ప్రస్తుతం పీర్​ పంజాల్​ పర్వతం, అటవీ ప్రాంతంపై పూర్తిగా దృష్టిపెడితే ఉగ్రవాదుల ఆట కట్టించవచ్చని ఇంటలిజెన్స్​ గుర్తించింది. 

ఉగ్రవాదులు దాడులకు పాల్పడి పారిపోతూ సురక్షితమైన బంకర్లను కూడా గుర్తించినట్లు తెలుస్తోంది. ఈ బంకర్లలో దాదాపు 57 నుంచి 59 మంది ఉగ్రవాదులు ఆశ్రయం పొందుతూ దాడులకు తెగబడుతున్నట్లుగా అధికారులు పేర్కొంటున్నారు. వీరిని మట్టుబెట్టేందుకు పూర్తిస్థాయిలో భారత భద్రతా బలగాలు అత్యాధునిక పరికరాలతో కూంబింగ్​ నిర్వహించాలని, పీర్​ పంజాల్​, అటవీ ప్రాంతాన్ని అణువణువునా శోధించాలని నిర్ణయించారు. ఈ ఆపరేషన్​ నేడో రేపో ప్రారంభం కానుంది. 

రాజౌరీ నుంచి కుప్వారా వరకు ప్రస్తుతం కూంబింగ్​ చేపట్టారు. సరిహద్దు ప్రాంతమైన హిల్​ కాకా నుంచి ఉగ్రవాదులు చొరబడేందుకు యత్నిస్తున్నారు. ఈ ప్రాంతాన్ని భారత ప్రభుత్వం పూర్తిగా మూసివేసింది.
 వీరి చర్యలను భద్రతా బలగాలు తిప్పికొడుతున్నాయి. మరోవైపు పంజాబ్​ లోని పఠాన్​ కోట్​ ఫాంగ్​ టోలీ సమీపంలో ఏడుగురు అనుమానితులను గుర్తించి వారి కోసం వేట కొనసాగిస్తున్నారు. వీరి స్కెచ్​ లను కూడా విడుదల చేశారు.పూంచ్​ లో అణువణువూ శోధించే ఆపరేషన్​ ను చేపట్టారు. 

త్వరలో జరగనున్న జమ్మూకాశ్మీర్​ ఎన్నికలను భగ్నం చేయాలనే వీరి ముఖ్యోద్దేశ్యమని ఇంటలిజెన్స్​ వర్గాల సమాచారం. ఈసారి నిర్వహించబోయే ఆపరేషన్​ లో స్థానికులను పూర్తి భాగస్వామ్యం చేసే దిశగా ఆర్మీ, పోలీసులు ప్రయత్నిస్తున్నారు. స్థానికులు అప్రమత్తమైతే ఉగ్రవాదుల కదలికలు పూర్తిగా పసిగట్టనున్నారు. మరోవైపు ఇప్పటికే సరిహద్దు గ్రామాల్లోని చాలామంది స్థానికులను ఈ ఆపరేషన్​ లో భాగస్వాములను చేసినట్లుగా సమాచారం. 

కేంద్ర భద్రత బలగాలు ఇటీవలే పలువురు స్లీపర్​ సెల్స్​, ఉగ్రవాదులకు సహాయం చేసే స్థానిక గైడ్స్​ ను అదుపులోకి తీసుకున్నాయి. వీరి ద్వారా ఉగ్రవాదుల పూర్తి సమాచారం సేకరించినట్లుగా తెలుస్తోంది. ఉగ్రవాదుల వద్ద ఏకే 47, ఎం 4, చైనీస్​ పిస్టల్​, స్టీల్​ బుల్లెట్లు, గ్రెనేడ్​, బాడీ కెమెరా శాటిలైట్​ మొబైల్​ ఫోన్​ లు ఉన్నట్లు తెలుసుకున్నారు. ఈ ఆయుధ డంప్​ లను పీర్​ పంజాల్​ లోని పర్వత పంక్తులు, అటవీ ప్రాంతంలో డంప్​ చేస్తున్నట్లుగా గుర్తించారు. 

మెరుపు దాడులతోనే ఉగ్రవాదుల ఆటకట్టించాలని నిర్ణయించారు. ఈ నేపథ్యంలో ఓ వైపు దృష్టి సారిస్తూ మరోవైపు దాడులకు తెగబడుతున్న ఉగ్రవాదులకు వారి పంథాలోనే జవాబు చెప్పాలని నిర్ణయించారు. ఈ ఆపరేషన్​ పేరు తదితర వివరాలు పూర్తిగా బయటికి పొక్కకపోయినా త్వరలోనే గతంలో జరిగిన సర్జికల్​ స్ర్టైక్​ మాదిరే ఉగ్రవాదులపై భారత్​ విజృంభించే అవకాశం ఉన్నట్లు తెలుస్తోంది.