భారత్​ కు మొయిజ్జూ?!

అక్టోబర్​ 7న ప్రధాని మోదీతో భేటీ?
పర్యటన ప్రకటించని మాల్దీవులు
విదేశాంగల చర్చల్లో సమసిన వివాదాలు
డ్రాగన్​ హ్యాండీయడంతో భారత్​ వైపు అధ్యక్షుడి చూపు

నా తెలంగాణ, న్యూ ఢిల్లీ: ఎట్టకేలకు మాల్దీవులు అధ్యక్షుడు మహ్మద్​ మొయిజ్జూ యూటర్న్​ తీసుకొని తోవకొస్తున్నారు. అక్టోబర్​ 7న ప్రధాని నరేంద్ర మోదీని కలిసేందుకు ఢిల్లీకి వచ్చే అవకాశం ఉందని ఆ దేశ అధికార వర్గాలు శుక్రవారం తెలిపాయి. అయితే ఇంకా ఈ విషయాన్ని అధికారికంగా ప్రకటించలేదు. తొలుత బలం, బలగం, ఆర్థికం అంటూ చైనా మాటలు విని భారత్​ తో పెట్టుకున్న మొయిజ్జూకు భారత్​ శాంతి పూర్వకంగానే సరైన సమాధానం చెప్పింది. ఆర్థిక సహాయంలో కోత విధించింది. దీంతో కక్కలేక, మింగలేక ఇటీవల పలువేదికలపై మళ్లీ మొయిజ్జూ భారత్​ పాట పాడుతున్నారు. ఏది ఏమైతేనేం భారత్​ (మోదీ) కోరుకుంటున్న శాంతి, సుస్థిరతల్లో భాగం కావాలని ఉవ్విళూరుతున్నారు. ఇరుదేశాల విదేశాంగ మంత్రుల సారథ్యంలో ఇటీవల పలుమార్లు భేటీ అయి ఇరుదేశాల మధ్య ఉన్న పొరపొచ్చాలను, సమస్యలను పరిష్కరించుకున్నామని ఆ దేశ విదేశాంగ శాఖ మంత్రి మూసా జమీర్​ ప్రకటించారు. ఈ నేపథ్యంలో మొయిజ్జూ పర్యటనకు మార్గం సుగమమైంది. మొత్తానికి డ్రాగన్​ కంట్రీ మాటలు విని భారత్​ తో పెట్టుకున్న మొయిజ్జూకు ఆదేశ పన్నాగం ఏంటో తెలిసినట్లుంది. అందుకే భారత్​ (ధర్మపథం) వైపు మొగ్గుచూపేందుకే  ఇష్టపడుతున్నారు.