బాలరాముడి ప్రాణప్రతిష్ఠ విఘాతానికి విదేశీ కుట్ర

నా తెలంగాణ, సెంట్రల్​ డెస్క్: అయోధ్యలో రామ మందిర నిర్మాణంపై చైనా, పాక్ ​లకు చెందిన హ్యాకర్లు కార్యక్రమానికి విఘాతం కలిగించేందుకు తీవ్రంగా ప్రయత్నించారని భారత ఇంటెలిజెన్స్ ​గుర్తించింది. ఇంటెలిజెన్స్ అధికారి ఒకరు ఈ విషయాన్ని మీడియాకు పుసగుచ్చినట్లు వివరించడంతో సమాచారం బయటికి పొక్కింది. హ్యాకర్ల ప్రయత్నాలను సాంకేతిక నిపుణుల బృందం విఫలం చేసింది. రామమందిర ఆలయ ట్రస్టు, యూపీ టూరిజం, పోలీసు, ఎయిర్ ​పోర్ట్, ప్రసార భారతి ఇలా అనేక వెబ్ ​సైట్​ల హ్యాకింగ్ ​కు ప్రయత్నించారని టీఎస్​ఓసీ (భారతదేశ టెలికాం ఆపరేషన్ సెంటర్) అధికారులు గుర్తించారు. కానీ సమాచారాన్ని బయటికి రానీయలేదు. హ్యాకింగ్ ​పై సంయుక్తంగా చర్యలు చేపట్టి నిర్వీర్యం చేశారు. ఒక్క ప్రసారభారతిని హ్యాక్​ చేసేందుకే 140 ఐపీ అడ్రస్ ​ల నుంచి ప్రయత్నాలు జరిగాయి.  

మొత్తం1244 ఐపీ చిరునామాలను అధికారులు బ్లాక్​ చేశారు. ఇందులో 999 చైనాకు చెందినవి కాగా, మిగిలినవి పాక్, హాంకాంగ్, కంబోడియాల నుంచి హ్యాకింగ్​ కు ప్రయత్నించారు. మరికొన్ని భారతదేశంలోని ఐపీ అడ్రస్ ​ల నుంచి కూడా హ్యాకర్లు ఈ వెబ్ ​సైట్​లను హ్యాక్​ చేసేందుకు ప్రయత్నించగా ఇప్పటికే ఆయా ఐపీ అడ్రస్ ​ల ద్వారా హ్యాకర్లపై చర్యలు తీసుకున్నట్లు తెలుస్తోంది. జీ–20 సమ్మిట్​ సందర్భంగా కూడా హ్యాకింగ్ ​కు తీవ్రంగా ప్రయత్నాలు జరిగాయని తెలుస్తోంది. డిజిటల్, మౌలిక సదుపాయాలు, మంత్రిత్వ రంగాలకు చెందిన వెబ్ ​సైట్ల హ్యాకింగ్ ​కు ప్రయత్నించగా, భారత సాంకేతిక బృందం ఈ చర్యలను తిప్పికొట్టింది. కాగా హ్యాకింగ్ ​ను అడ్డుకునేందుకు ఇటీవలే భారత్​ అభివృద్ధి చేసిన నూతన ఏఐ టెక్నాలజీని తొలిసారిగా వాడి విజయం సాధించడం విశేషం.