అంత్యక్రియల కోసం యాచించిన చిన్నారి దుర్గ

నా తెలంగాణ, నిర్మల్: కొద్దిరోజుల క్రితమే తండ్రి మృతిచెందాడు. ఆ బాధ తట్టుకోలేక తల్లి కూడా శనివారం  రాత్రి ఆత్మహత్య చేసుకుంది. వారికి ఉన్న పదకొండేళ్ల కూతురు దుర్గ పరిస్థితి అగమ్య గోచరంగా మారింది. అయినవారెవరూ తోడు లేకపోవడంతో చిన్నారి తల్లి శవాన్ని ఇంట్లో పెట్టుకొని అంత్యక్రియలు జరిపేందుకు స్థానికంగా యాచిస్తోంది. ఈ హృదయవిదారక ఘటన పలువురిని కంటతడి పెట్టిస్తోంది. నిర్మల్​ జిల్లా తానూరు మండలానికి చెందిన గంగమణి తనభర్తతో దూరంగా ఉంటూ కూలీ నాలీ చేసుకొని కూతురు దుర్గను ప్రభుత్వ పాఠశాలలో చదివించేది. కొద్ది రోజుల క్రితమే భర్త మృతిచెందాడు. ఓ వైపు ఆర్థిక ఇబ్బందులు, మరోవైపు నా అనేవారెవ్వరూ తోడు లేకపోవడంతో తీవ్ర మానసిక్ష క్షోభ అనుభవించేది. దీంతో ఆత్మహత్యకు పాల్పడింది. తల్లిదండ్రులు చనిపోవడంతో దుర్గ అనాథలా మిగిలింది. చేతిలో చిల్లిగవ్వ కూడా లేకపోవడంతో ఆదివారం ఉదయం ఇంటిముందు టవల్​ పరుచుకొని తల్లి అంత్యక్రియలకు సహాయం చేయాలని విషన్న వదనాలతో యాచించడం పలువురిని కంటతడి పెట్టించింది. విషయం తెలుసుకున్న గ్రామ పెద్దలు తలా ఓ చేయి వేసి అంత్యక్రియలు నిర్వహించారు. తల్లికి చిన్నారి తలకొరివి పెట్టాల్సిన దుస్థితి నెలకొనడంతో ఈ దృశ్యాలను చూస్తున్న వారికి కన్నీరే మిగిలింది. 

దుర్గను ఆదుకుంటాం: కలెక్టర్ అభిలాష అభినవ్..

ఈ ఉదంతం అధికారుల ద్వారా తెలుసుకున్న జిల్లా కలెక్టర్ అభిలాష అభినవ్ తీవ్ర విచారం వ్యక్తం చేశారు. బాలికలో ఫోన్​ లో మాట్లాడి ఆమెకు ధైర్యం చెప్పారు. బాలికను అన్ని విధాలుగా ఆదుకుంటామని, విద్యాబుద్ధులు నేర్పి మంచి భవిష్యత్​ కు పునాది వేస్తామని భరోసా ఇచ్చారు.