బీజేపీలోకి చంపై సోరెన్​?

రాంచీ: ఝార్ఖండ్​ జేఎంఎం పార్టీలో రాజకీయ గందరగోళం కొనసాగుతోంది. ఆ పార్టీ మాజీ సీఎం, సీనియర్​ నేత చంపై సోరెన్​ ఆరుమంది ఎమ్మెల్యేలతో బీజేపీలో చేరనున్నారనే వార్తలు హాట్​ టాపిక్​ గా మారాయి. శనివారం కోల్​ కతాలో ఉన్న చంపై సోరెన్​ ఆదివారం ఉదయం ఢిల్లీకి పయనమయ్యారు. ఈ నేపథ్యంలో ఆయన బీజేపీలో చేరనున్నారనే వార్తలు హాట్​ టాపిక్​ గా మారాయి. బీజేపీలో చేరడంపై కేంద్రమంత్రి శివరాజ్​ సింగ్​ చౌహాన్​, సువేందు అధికారితో కూడా సంప్రదింపులు జరిపినట్లు తెలుస్తుంది.

 హేమంత్​ సోరెన్​ బెయిల్​ నుంచి వచ్చాక సీఎం పదవికి చంపై రాజీనామా చేయడంపై ఆయన తరఫు ఎమ్మెల్యే తీవ్ర మనస్థాపం చెందారు. దీంతో ఆయన సీనియారిటీకి కూడా మర్యాద ఇవ్వకుండా పదవి నుంచి తప్పించడంపై హేమంత్​ సోరెన్​ నిర్ణయంపై గుర్రుగా ఉన్నారు. ఈ నేపథ్యంలో చంపై కూడా గత కొన్ని రోజులుగా పార్టీ కార్యకలాపాలలో అంటీముట్టనట్లుగానే వ్యవహరిస్తున్నారు. 

దీంతో ఆయన ఇక పార్టీ వీడడం ఖాయమనే సంకేతాలు వెలువడుతున్నాయి. కాగా ఝార్ఖండ్​ అసెంబ్లీ కాలం జనవరితో ముగియనుంది. అసెంబ్లీ ఎన్నికలు ఎప్పుడు నిర్వహిస్తారనేది ఇంకా ఈసీ వెల్లడించలేదు. 

ఆరుగురు ఎమ్మెల్యేలలో దశరథ్​ గగ్రాయ్​, రాందాస్​ సోరెన్​, చమ్రా లిండా, లోబిన్​ హెంబ్రోమ్​, సమీర్​ మొహంతిలు బీజేపీలో చంపైతోపాటు చేరే వారి లిస్టులో ఉన్నట్లుగా తెలుస్తోంది. అయితే ఝార్ఖండ్​ బీజేపీ ఎన్నికల ఇన్​ చార్జీగా అసోం సీఎం హిమంత బిస్వా శర్మ ఉన్నారు. ఈయనతో కలిసి బీజేపీ పెద్దలతో చర్చలు జరిపి పార్టీలో చేరనున్నట్లు సమాచారం. 

ఏది ఏమైనా అదే జరిగితే జేఎంఎంకు పెద్ద దెబ్బ అనే చెప్పాలి. ఝార్ఖండ్​ లో ప్రస్తుతం కాంగ్రెస్​ తో కలిసి జేఎంఎం సంకీర్ణ ప్రభుత్వం ఏర్పాటు చేసినప్పటికీ భవిష్యత్​ లో చంపై సోరెన్​ పార్టీని వీడడం ఈ రెండు పార్టీలకూ పెద్ద దెబ్బే అవుతుందని రాజకీయ విశ్లేషకులు భావిస్తున్నారు. 
ఝార్ఖండ్​ లో మొత్తం 82 అసెంబ్లీ స్థానాలు ఉన్నాయి. గతంలో జేఎంఎంకు 26 మంది, కాంగ్రెస్‌కు 22 మంది ఎమ్మెల్యేలు ఉన్నారు. దీంతో పాటు బీజేపీకి చెందిన 22 మంది ఎమ్మెల్యేలు, ఏజేఎస్‌యూకు చెందిన 3, సీపీఎం-ఎల్ 1, ఎన్సీపీ 1, ఆర్జేడీ 1, ఇద్దరు స్వతంత్ర ఎమ్మెల్యేలు ఉన్నారు.