విద్యార్థి దారుణ హత్య
రోడ్డుపై బైఠాయించిన విద్యార్థి సంఘాలు ఆర్డీవో హామీతో విరమణ
నా తెలంగాణ, ఆదిలాబాద్: ఆదిలాబాద్ జిల్లా మావల పోలీస్ స్టేషన పరిధిలో జరిగిన బీఎస్సీ విద్యార్థి హత్య తీవ్ర కలకలం రేపుతోంది. ఈ నేపథ్యంలో హత్యకు పాల్పడినవారిని వెంటనే అరెస్టు చేసి కఠినంగా శిక్షించాలని పలు సంఘాలు రోడ్డుపై బైఠాయించడంతో మరింత ఉద్రిక్తతలకు కారణమవుతోంది. విషయం తెలుసుకున్న డీఎస్పీ జీవన్ రెడ్డి, ఆదిలాబాద్ రూరల్ సీఐ ఫణిధర్, ఎస్ ఐ విష్ణువర్ధన్ లు సంఘటనా స్థలానికి చేరుకొని ఆందోళన విరమింప చేసేందుకు ప్రయత్నించారు.
నార్నూర్ మండలంలోని చోర్ గావ్ కు చెందిన రాథోడ్ ధనిసింగ్, మీరాబాయి దంపతులు మూడో కుమారుడు రాథోడ్ జితేందర్. జిల్లా కేంద్రంలోని ప్రభుత్వ గిరిజన బాలుర వసతి గృహంలో బీఎస్సీ విద్యనభ్యసిస్తున్నాడు. శుక్రవారం రాత్రి స్నేహితుడితో మాట్లాడి హాస్టల్ లోకి తిరిగి వస్తుండగా గుర్తు తెలియని వ్యక్తులు అతన్ని తీసుకువెళ్లారు. బలవంతంగా మద్యం తాగించి సీసాతో జితేందర్ ఛాతీ, తల, కాళ్లు, శరీర భాగాలపై దారుణంగా పొడిచి హత్య చేశారు. విషయం స్నేహితుల ద్వారా తెలుసుకున్న బంధువు నగేష్ జితేందర్ ను రిమ్స్ కు తరలించారు. చికిత్స పొందుతూ విద్యార్థి శనివారం సాయంత్రం మృతి చెందాడు. దీంతో ఉద్రిక్తతలకు కారణమైంది. విద్యార్థి హత్యపై హాస్టల్ వార్డెన్, అధికారుల నిర్లక్ష్యం కూడా ఉందని విద్యార్థి సంఘాలు, కుటుంబ సభ్యులు, బంధువులు ఆరోపిస్తూ పెద్ద ఎత్తున రోడ్డుపై బైఠాయించారు. ఆర్డీవో ఘటనా స్థలానికి వచ్చి బాధితులతో మాట్లాడి హామీ ఇచ్చాక ఆందోళన విరమించారు.
ఈ ఆందోళనలో ఆదిలాబాద్ లంబాడీ జేఏసీ ఉమ్మడి జిల్లా శాఖ అధ్యక్ష, ప్రధాన కార్యదర్శులతోపాటు భారీ ఎత్తున జేఏసీ సభ్యులు పాల్గొన్నారు.
