కువైట్ అగ్నిప్రమాదం.. కేరళకు భౌతికకాయాలు
గాయపడ్డ వారికి అత్యాధునిక వైద్యానికి ఏర్పాట్లు మృతులకు నివాళులర్పించిన కేంద్ర మంత్రి సురేశ్ గోపీ విచారం వ్యక్తం చేసిన కేంద్రమంత్రి కీర్తి వర్ధన్ సింగ్
తిరువనంతపురం: కువైట్ మంగాఫ్ అగ్నిప్రమాదంలో మృతిచెందిన 45 మంది భారతీయులను శుక్రవారం కేరళకు తీసుకువచ్చారు. గురువారం డీఎన్ఏ పరీక్షల అనంతరం రాత్రి వైమానిక దళ ప్రత్యేక విమానం సీ 130–జెలో మృతదేహాలను కేంద్రమంత్రి కీర్తివర్ధన్ సింగ్ తీసుకొని వచ్చారు. శుక్రవారం ఉదయం ఈ విమానం కేరళకు చేరుకుంది. మృతుల్లో 23 మంది కేరళకు చెందిన వారు కాగా, తమిళనాడు 7, ఆంధ్ర, యూపీ ఒక్కొక్కరు, బిహార్, ఒడిశా, కర్ణాటక, మహారాష్ర్ట, ఝార్ఖండ్, హరియాణా, పంజాబ్, పశ్చిమ బెంగాల్ లకు చెందిన ఒక్కొక్కరు మృతి చెందారు. మరో మృతుడి వివరాలు తెలియరాలేదు. అయితే అగ్నిప్రమాదంలో మొత్తం 49 మంది చనిపోగా అందులో ఫిలిప్పిన్స్, నేపాల్, పాక్, ఈజిప్ట్ కు చెందిన వారు కూడా ఉన్నారు.
కేరళ విమానాశ్రయానికి చేరుకున్న బీజేపీ నాయకుడు కేంద్రమంత్రి సురేశ్ గోపీ తీవ్ర విచారం వ్యక్తం చేశారు. మృతదేహాలకు నివాళులర్పించారు. వారి కుటుంబాలకు అన్ని విధాలుగా కేంద్రం అండగా ఉంటుందని గోపీ ప్రకటించారు.
అనంతరం సీఎం పినరయి విజయ్ కూడా విమానాశ్రయానికి చేరుకొని మృతులకు నివాళులర్పించారు.
కేంద్రమంత్రి కీర్తివర్ధన్ సింగ్ గాయపడ్డ భారతీయులను పరామర్శించారు. వారి చికిత్సకు అయ్యే అన్ని ఏర్పాట్లను చేశారు. కువైట్ మంత్రిత్వ శాఖలను సమన్వయం చేసుకొని వెంటనే చర్యలకు ఉపక్రమించారు. దీంతో గాయపడిన వారికి మెరుగైన వైద్యం లభిస్తోంది. మృతదేహాలను త్వరగా భారత్ కు తీసుకురాగలిగారు. ఏది ఏమైనా ఈ సంఘటన అత్యంత బాధాకరమని కేంద్రమంత్రి కీర్తివర్ధన్ సింగ్ విచారం వ్యక్తం చేశారు. విదేశాల్లో ఉన్న భారతీయుల సురక్షిత బాధ్యతలను కూడా తీసుకుంటామని మోదీ నేతృత్వంలో చర్యలకు కట్టుబడి ఉంటామని మంత్రి ప్రకటించారు.
