ఎకరాకు రూ. 30వేల నష్టపరిహారం
పెద్ద చెరువుకు గండి అధికారులదే బాధ్యత మాజీ ఎమ్మెల్యే పద్మా దేవేందర్ రెడ్డి
నా తెలంగాణ, మెదక్: గండిపడ్డ పెద్ద చెరువు పరిసర ప్రాంతాల్లోని వరి పొలాలను తక్షణమే ఎకరాకు రూ. 30 వేల చొప్పున పంట నష్టపరిహారం చెల్లించాలని మెదక్ మాజీ ఎమ్మెల్యే పద్మా దేవేందర్ రెడ్డి డిమాండ్ చేశారు. మంగళశారం పెద్ద చెరువు వద్ద నీటమునిగిన పంటలను పరిశీలించారు. ఈ సందర్భంగా ఆమె మాట్లాడుతూ.. చెరువుకు చిన్నగా గండిపడినప్పుడే చర్యలు తీసుకొని ఉంటే ఇంత నష్టం వాటిల్లేది కాదన్నారు. అధికారుల నిర్లక్ష్యం వల్లే భారీ నష్టం వాటిల్లిందని అన్నారు. 200 ఎకరాలలో పంట నీట మునిగిందన్నారు. ప్రభుత్వం మొద్దు నిద్దుర వల్ల రాష్ర్టంలో 32 మంది మృతి చెందారని ఆవేదన వ్యక్తం చేశారు. వరదబాధితులను గతంలో కేసీఆర్ ప్రభుత్వం ఏ విధంగా ఆదుకుందో అదేవిధంగా ఆదుకోవాలని డిమాండ్ చేశారు.
వెంటనే పెద్దచెరువు కట్ట గంటిని పూడ్చాలని ఆమె డిమాండ్ చేశారు. అధికారులు, ప్రభుత్వం స్పందించకుంటే తామే తెగిన కట్టను పూడ్చుకుంటామన్నారు. ఈ కార్యక్రమంలో పద్మా దేవేందర్ రెడ్డి వెంట హవెలిఘనపూర్ మండల బీఆర్ఎస్ పార్టీ అధ్యక్షులు సిహెచ్ శ్రీనివాస్ రెడ్డి, మాజీ జిల్లా పరిషత్ ఉపాధ్యక్షురాలు ఎం. లావణ్య రెడ్డి, నాయకులు కిష్టయ్య, మేకల సాయిలు, రామచంద్ర రెడ్డి, సతీష్ రావు, నరేందర్ రెడ్డి, గ్రామస్తులు తదితరులు పాల్గొన్నారు.
