యువత రాజకీయాల్లోకి రావాలి

స్వామి వివేకానంద జయంతి సందర్భంగా యూత్​ కాన్ఫరెన్స్​ లో ప్రధాని

నా తెలంగాణ, న్యూ ఢిల్లీ: రాజకీయాలకతీతంగా లక్షలమంది యువతను రాజకీయాల్లోకి తీసుకొచ్చే ప్రయత్నాలను కొనసాగిస్తామని ప్రధానమంత్రి నరేంద్ర మోదీ అన్నారు. ఆదివారం స్వామి వివేకానంద జయంతి సందర్భంగా న్యూ డిల్లీ భారత్ మండపంలో నిర్వహిస్తున్న డెవలప్డ్​ ఇండియా యూత్​ కాన్ఫరెన్స్​ లో పాల్గొని యువకులతో సంభాషించారు. విద్యార్థులు, సాంకేతిక నిపుణులు ఏర్పాటు చేసిన స్టాళ్లను, వారు ప్రదర్శిస్తున్న పలు వస్తువులను పరిశీలించి వాటిగురించిన సమాచారాన్ని అడిగి తెలుసుకున్నారు. యువతను ప్రోత్సహించారు. భారత్​ మండపంలో 10 అంశాలకు సంబంధించిన ప్రదర్శనలను వీక్షించారు. ప్రదర్శనలో మేటీ ప్రదర్శనలకు సర్టిఫికెట్లు ప్రదానం చేయనున్నారు. అనంతరం ప్రధాని మీడియాతో సంక్షిప్తంగా మాట్లాడారు. దేశ యువత సైన్స్​, టెక్నాలజీ, ఇన్నోవేషన్​, కల్చర్​ అంశాల్లో మక్కువ చూపుతుందన్నారు. సంప్రదాయబద్ధంగా యూత్​ ఫెస్టివల్​ నిర్వహణతో యువతలోని విభిన్న కోణాలను బయటకు తీసుకొస్తామన్నారు. దీంతో అభివృద్ధి చెందిన భారత్​ ఆలోచనలు సాకారం చేస్తామన్నారు. ప్రస్తుత సమాజంలో సాంకేతిక పరిజ్ఞానం ఎంతో అవసరమని, కీలకమని అన్నారు. నిరంతరం యువత అప్​ గ్రేడ్​ దిశగా అడుగులు వేయాలన్నారు. భారత్​ అభివృద్ధికి నూతన ఆవిష్కరణల సహకారం అవసరమన్నారు. యువత దీనికి అనుగుణంగా ఎదగాలన్నదే తమ అభిమతం అని మోదీ తెలిపారు. అంతేగాకుండా రాజకీయాలకతీతంగా యువత రాజకీయాల్లోకి వస్తే దేశంలో మరిన్ని మార్పులు సాధ్యమని ప్రధాని నరేంద్ర మోదీ అన్నారు.