ట్రైనీ వైద్యుడి పరిస్థితి విషమం
The condition of the trainee doctor is critical
డిమాండ్ల సాధనకు కొనసాగుతున్న నిరవధిక నిరాహార దీక్ష
ఆర్జీకర్ సీసీయూలో చికిత్స
కోల్ కతా: కోల్ కతాలోని ఆర్జీకర్ ట్రైనీ వైద్యుల నిరవధిక నిరాహార దీక్షలు కొనసాగుతున్నాయి. శుక్రవారం ఓ వైద్యుడి పరిస్థితి విషమించడంతో అతన్ని పోలీసులు బలవంతంగా క్రిటికల్ కేర్ యూనిట్ లో చేర్చి చికిత్స అందజేస్తున్నారు. ఆసుపత్రి ఇన్ చార్జీ డా. సోమా ముఖోపాధ్యాయ మాట్లాడుతూ.. ట్రైనీ వైద్యుడు అనికేత్ సొమ్మసిల్లి పడిపోవడంతో ఆసుపత్రి సీసీయూలో అతనికి చికిత్సనందిస్తున్నామని తెలిపారు. ప్రస్తుతం అతని పరిస్థితి విషమంగా ఉందన్నారు. అనికేత్ ఆహారం, నీరు తీసుకోకపోవడంతో ఆరోగ్య పరిస్థితి విషమించిందన్నారు. ఐదుగురు వైద్యుల బృందం అతనికి చికిత్సనందిస్తుందని సోమా తెలిపారు.
ట్రైనీ వైద్యుడు దేబాశిష్ మాట్లాడుతూ.. మరో ఆరుగురు వైద్యుల ఆరోగ్య పరిస్థితులు కూడా ఏం బాగాలేవన్నారు. ప్రభుత్వం ట్రైనీ విద్యార్థుల డిమాండ్లను నెరవేర్చడంలో విఫలం కావడంతో మరోమారు ఏడుగురు వైద్యులు 6 అక్టోబర్ నుంచి నిరవధిక నిరాహార దీక్షకు దిగారు.
