రామభజనలో పాల్గొంటావా.. గొడ్డళ్లతో దాడి

అడ్డుకున్న కుమారులకూ గాయాలు
దర్యాప్తు చేపట్టామన్న అయోధ్య పోలీసులు
రామ మందిర నిర్మాణానికి మద్ధతిచ్చినందుకు ఆగ్రహం

పాట్నా: అయోధ్యలో బీజేపీ నాయకుడు బబ్లూఖాన్​ పై గుర్తుతెలియని దుండగులు గొడ్డలితో దాడి చేశారు. ఈయన రామభజనలో పాల్గొన్నందుకే దాడికి పాల్పడినట్లుగా తెలుస్తోంది. శనివారం ఉదయం ఆయనపై దాడి జరిగింది. దర్శన్​ నగర్​ చౌకీ ప్రాంతంలోని మీర్జాపూర్​ మాఫీ గ్రామంలో రామ మందిరంలో  భజన జరుగుతోంది. బబ్లూఖాన్​ ఈ కార్యక్రమంలో పాల్గొన్నారు. దీంతో ఆగ్రహించిన కొందరు దుండగులు ఈయనపై గొడ్డళ్లు, కత్తులు, కర్రలతో దాడులకు పాల్పడ్డారు. ఈ దాడిలో బబ్లూ ఖాన్​ కు తీవ్ర గాయాలయ్యాయి. పోలీసులు కేసు నమోదు చేసి దర్యాప్తు చేపట్టారు. 

శ్రీరాముడి భజనలో పాల్గొన్నందుకే అతనిపై దాడి చేశారని ఫిర్యాదు అందిందని అయోధ్య పోలీసులు బబ్లూఖాన్​ తోపాటు ఆయన ముగ్గురు కుమారులకు కూడా గాయాలయ్యాయని తెలిపారు. బబ్లూఖాన్​ తన మద్ధతుదారులతో తన క్యాంపు కార్యాలయంలో రామ భజన చేస్తుండగా గుర్తుతెలియని దుండగులు ఈ దాడికి పాల్పడ్డారని చెప్పారు. అయితే కొందరు ఈయన వర్గానికి చెందిన వారే ఖాన్​ భజనపై అభ్యంతరం చేసినట్లు తమ దృష్టికి వచ్చిందన్నారు. వారందరిని విచారిస్తామన్నారు. కేసు నమోదు చేసి నిందితుల కోసం గాలింపు చర్యలు చేపట్టామని అయోధ్య పోలీసులు చెప్పారు. బబ్లూఖాన్​, ఆయన కుమారులు ప్రస్తుతం చికిత్స పొందుతున్నారని తెలిపారు. 

కాగా 2014 నుంచి రామ మందిరానికి బబ్లూఖాన్​ మద్ధతిచ్చారు. అప్పటి నుంచే అడపా దడపా ఆయనపై ముస్లింలలో ఆగ్రహం వ్యక్తం అవుతుందని పలు సందర్భాల్లో బీజేపీ నిర్ణయాలను సమర్థించడంతో వీరిలో ఆగ్రహం మరింతగా పెరిగింది. దీనికి తోడు బబ్లూఖాన్​ సంస్కృత శ్లోకాలను కూడా అవలీలగా బహిరంగ వేదికలపై వినిపిస్తుండడం కూడా వీరి కోపానికి మరో కారణమైంది.