ట్రూడో దుర్భుద్ధి.. మసకబారుతున్న ప్రతిష్ఠ
దారిమళ్లించేందుకే భారత్ పై ఆరోపణలు
సొంతపార్టీలోనే విభేదాలు
సర్వేలతో ట్రూడోకు చుక్కలు
కెనడా రాజకీయాల్లో పాక్ ముఖ్య పాత్ర
సెక్యూరిటీ అధికారి వెనెస్సా లాయిడ్
ఖలిస్థానీలకు పాక్ మద్ధతు!
నా తెలంగాణ, సెంట్రల్ డెస్క్: ఓ వైపు సమీపిస్తున్న ఎన్నికలు.. మరోవైపు కెనడాలో ట్రూడో పార్టీకి మసకబారుతున్న పరువు.. ఇంకోవైపు ఓటు బ్యాంకు రాజకీయాలు.. వీటన్నింటినీ సమర్థవంతంగా వినియోగించుకొని భారత్ ను ఊబిలోకి నెట్టి లబ్ధిపొందాలనే కుటిలయత్నానికి ట్రూడో తెరలేపారా? అంటే అవుననే సమాధానం వినిపిస్తోంది. భారత్ తో కయ్యానికి కాలుదువ్వడాన్ని సొంతపార్టీ (లిబరల్ పార్టీ ఆఫ్ కెనడా) నాయకులే ట్రూడోతో తీవ్రంగా విభేధిస్తున్నారు. తెలివిగా ప్రజాదృష్టిని మళ్లిస్తున్నారనే ఆరోపణలు చేస్తున్నారు. భారత్ లో ఉగ్రవాదులుగా ముద్రపడ్డ పంజాబ్ లోని పలు సంస్థలన్నీ కెనడా నుంచే కార్యకలాపాలను నిర్వహిస్తున్నాయని ప్రపంచానికి తెలిసిన బహిరంగ రహాస్యమే. కాగా ఎన్నికలకు ఒక యేడాది ముందే ట్రూడో ఈ విధంగా పాల్పడుతుండడాన్ని పలువురు తీవ్రంగా విమర్శిస్తున్నారు.
7.70 లక్షల మంది ఉన్న సిక్కు పార్టీల మద్ధతు కూడగట్టుకునేందుకు ట్రూడో ప్రభుత్వం పాక్, ఖలిస్థానీలతో కలిసి భారత్ పై విష ప్రచారానికి తెరలేపింది. ప్రస్తుతం ఎన్నికల తరుణంలో కెనడా జాతీయులలో ఆయనపై మక్కువ లేదని పలు అంతర్గత సర్వేల ద్వారా తేటతెల్లం అయ్యింది. ఈ నేపథ్యంలో కొత్త గేమ్ కు తెరతీసినట్లు తెలుస్తోంది. ఈ దిశగా ప్రజల ఆలోచనలను మళ్లించినట్లయితే తాను ఏమీ తక్కువ తినలేదని కెనడా ప్రయోజనాలకు కట్టుబడి ఉన్నానని తన ఢంకా తానే మోగించుకోవచ్చనే దుర్బుద్ధితోనే నిజ్జర్ హత్య ఆరోపణలను లేవనెత్తుతున్నట్లు సమాచారం. కొద్ది రోజుల క్రితం కెనడా సెక్యూరిటీ ఇంటలిజెన్స్ సర్వీస్ డైరెక్టర్ వెనెస్సా లాయిడ్ కెనడా రాజకీయాల్లో పాక్ ముఖ్య పాత్ర పోషిస్తుందని బహిరంగంగానే అంగీకరించారు. అదే సమయంలో ఖలిస్థానీలకు కూడా పాక్ మద్ధతు ఇస్తుందన్నారు.
ఈ అంశాన్ని సూక్ష్మంగా పరిశీలిస్తే ట్రూడో దుర్భుద్ధి వెనుక అసలు కారణం తేటతెల్లం అవుతుంది. పాక్ తో చేతులు కలిపి కెనడా ప్రయోజనాలను నెరవేర్చడంలో విఫలమయ్యారనే అపవాదును మూటగట్టుకొనే అంశాన్ని పక్కకు నెట్టేందుకు ప్రయత్నిస్తున్నారని తెలుస్తుంది. ఇదే సమయంలో పాక్ ఆలోచనా విధానాన్ని కెనడా ట్రూడో అందిపుచ్చుకుంటున్నారు. ఉగ్రవాదం అనే ఉచ్చులో పాక్ చిక్కుకున్నట్లుగా కెనడా చిక్కుకోదనడంలో గ్యారంటీ లేదు. ఈ రోజు భారత్ కు మోస్ట్ వాంటెడ్ గా ఉన్న ఖలిస్థానీ ఉగ్రవాద గ్రూపును ఓటుబ్యాంకు రాజకీయాల కోసం ట్రూడో వెనకేసుకొస్తే రేపు జరగబోయే పరిణామాలకు కూడా ఆయనే బాధ్యత వహించాల్సి ఉంటుంది.
ఇప్పటికే అంతర్జాతీయ సంస్థలోనూ ఈ ఉగ్రవాద గ్రూపు చేసిన ఆగడాలను, దాడులను వివరిస్తూ భారత్ అనేక చర్యలు తీసుకున్నా కెనడా మాత్రం సహకరించలేదు. పైగా ఉగ్రవాద గ్రూపులకు సహకరిస్తూ వారిని వెనకేసుకొస్తూ భారత ఉన్నతాధికారులే హంతకులుగా చిత్రీకరించే ప్రయత్నాన్ని మొదలెట్టింది. ఇది ఇరుదేశాల సంబంధాలను పూర్తిగా దెబ్బతీసే అవకాశం ఉంది.
అమెరికా, ఆస్ర్టేలియా, న్యూజిలాండ్, బ్రిటన్ లతోనూ తన దర్యాప్తు వివరాలను పంచుకుంది. అయితే ఈ దేశాలు ఇరుదేశాలు దర్యాప్తులో ఒకరికొరు సహకరించుకుంటూ సంయుక్తంగా ముందుకు వెళితేనే సమస్యకు పరిష్కారం లభించగలదన్నారు.
