ఉద్రిక్తతలు తగ్గించడమే లక్ష్యం
క్వాడ్ సదస్సులో ప్రధాని మోదీ
ఇండిపసిఫిక్ దేశాల బంధాలు మరింత బలోపేతం
4కోట్ల గర్భాశయ వ్యాక్సిన్లు అందజేస్తాం
సీ గార్డియన్ డ్రోన్ల కొనుగోలుపై కుదిరిన ఒప్పందం
యూఎన్ఎస్ సీలో భారత్ సభ్యత్వానికి మద్ధతు: బైడెన్
వాషింగ్టన్: ప్రపంచంలో పలుదేశాల్లో నెలకొన్న ఉద్రిక్తతలు తగ్గించడం, అదే సమయంలో క్వాడ్ దేశాల సమగ్రతను కాపాడుకోవడం, ద్వైపాక్షిక బంధాలు మెరుగుపర్చుకోవాలని క్వాడ్ దేశాల సమావేశంలో నిర్ణయించారు. ఆదివారం డేలావేర్ లోని శిఖరాగ్ర సమావేశంలో ప్రధాని నరేంద్ర మోదీ, అమెరికా అధ్యక్షుడు జో బైడెన్, ఆస్ట్రేలియా పీఎం అంథోనీ అల్బనీస్, జపాన్ పీఎం ఫుమియో కిషిదాతో సమావేశమయ్యారు. సమావేశ అనంతరం ఫోటోషూట్ లో పాల్గొన్నారు. ఈ సందర్భంగా జో బైడెన్ ప్రధాని మోదీ భుజంపై చేయి వేసి ప్రధాని చర్యలను కొనియాడారు. సమావేశం అనంతరం ఆస్ట్రేలియా పీఎం అంథోనీ అల్బనీస్, జపాన్ పీఎం ఫుమియో కిషిదాతో కూడా ప్రధాని మోదీ ప్రత్యేకంగా భేటీ అయి పలు ద్వైపాక్షిక అంశాలపై చర్చించారు.
ప్రధాని మోదీ: ఈ సందర్భంగా ప్రధాని మోదీ శిఖరాగ్ర సమావేశంలో మాట్లాడుతూ.. వివాదాలు చుట్టుముట్టిన తరుణంలో ఈ సమావేశం నిర్వహించడం ఎవరికీ వ్యతిరేకం కాదన్నారు. శాంతియుత పరిస్థితులకు పరిష్కారం దిశగా కూడా సమావేశంలో మాట్లాడామన్నారు. ఇండో పసిఫిక్ ప్రాంతం అత్యంత వేగంగా అభివృద్ధి చెందుతోందన్నారు. దాన్ని మరింత ముందుకు తీసుకువెళ్లేందుకు చర్చించామన్నారు. అమెరికాతో మూడు బిలియన్ డాలర్ల సీ గార్డియన్ డ్రోన్ ల చర్చ అనంతరం ఒప్పందం కుదిరింది. ఈ ఒప్పందం ప్రకారం 31 అత్యాధునిక డ్రోన్ లను భారత్ కొనుగోలు చేయనుంది. భారత్ ప్రపంచంలో అతిపెద్ద ఆరోగ్య బీమా పథకాన్ని అమలు చేస్తోందన్నారు. గర్భాశయ క్యాన్సర్ నిరోధానికి స్వంత వ్యాక్సిన్ ను కూడా తయారు చేశామన్నారు. 7.5 మిలియన్ డాలర్ల విలువైన నమూనా కిట్లు, డిటెక్షన్ కిట్లు, వ్యాక్సిన్ లను కూడా పంపిణీ చేస్తామని మోదీ ప్రకటించారు. వచ్చే క్వాడ్ సమావేశాన్ని భారత్ లో నిర్వహించేందుకు ఎంతో ఉత్సుకతగా ఎదురు చూస్తున్నానని ప్రధాని మోదీ తెలిపారు. క్వాడ్ చరిత్ర సుధీర్ఘమైనదని, సంప్రదాయాలకు కట్టుబడి సదస్సు నిర్వహిస్తామన్నారు. ఈ సమావేశంలో ప్రధాని మోదీతోపాటు మంత్రి జై శంకర్, విదేశాంగ కార్యదర్శి విక్రమ్ మిస్ర్తీ, భారత రాయబారి వినయ్ మోహన్ తదితరులు పాల్గొన్నారు.
సమావేశానికి ముందు మోదీకి ప్రవాస భారతీయులు స్వాగతం పలికారు. ప్రధాని వారిని కలిసి ఉత్సాహపరిచారు.
జో బైడెన్: ప్రజాస్వామ్య దేశంలో ఎలా పనిచేయాలో క్వాడ్ దేశాలకు తెలుసని ఇన్నేళ్ల తరువాత కూడా తాము గతంలో కంటే ఐక్యంగా, పటిష్ఠంగా ఉన్నామని అన్నారు. క్వాడ్ దేశాల మధ్య మరింత సహకారం పెంపొందించే దిశగా చర్చలు ఫలప్రదం అయ్యాయని తెలిపారు. అలాగే యూఎన్ ఎస్ సీ (ఐక్యరాజ్యసమితి)లో భారత్ కు సభ్యత్వం అందజేయాలన్న విషయంపై కట్టుబడి ఉన్నామని తెలిపారు. క్వాడ్ ఇచ్చే ఫెలోషిప్ లో ఆగ్నేయాసియా దేశాల విద్యార్థులను కూడా చేర్చుకుంటామని తెలిపారు. ఇండోపసిఫిక్ లో ప్రస్తుతం అత్యంత ఆందోళన కలిగించే అంశం గర్భాశయ క్యాన్సర్ అన్నారు. ఈ ముప్పును ఎదుర్కొనేందుకు భారత్ నాలుగు కోట్ల వ్యాక్సిన్లను అందించాలని నిర్ణయించడంపై బైడెన్ హర్షం వ్యక్తం చేశారు. ఇండోపసిఫిక్ ప్రాంతంలో ప్రతీయేటా 1.5 లక్షలమంది మహిళలు గర్భాశయ క్యాన్సర్ తో మరణిస్తున్నారని ఆవేదన వ్యక్తం చేశారు. దీనిపై క్వాడ్ దేశాలతో కలిసి పనిచేస్తూ పూర్తి నివారణకు కట్టుబడి ఉన్నామన్నారు.
