హస్తం మేనిఫెస్టో అబద్దాల మూట

న్యూఢిల్లీ: కాంగ్రెస్​ మేనిఫెస్టో అబద్ధాల మూట అని బీజేపీ అధికార ప్రతినిధి, రాజ్యసభ ఎంపీ సుధాన్షు త్రివేది ఆరోపించారు. శుక్రవారం ఉదయం కాంగ్రెస్​ మేనిఫెస్టో విడుదల చేయగా అందులో విదేశాలకు సంబంధించిన ఫోటోలను వాడినట్లు సుధాన్షు త్రివేది మీడియాకు వివరించారు. ఎన్నికల వాగ్ధానాలు నెరవేర్చడంలో కాంగ్రెస్​ ఎప్పుడూ నిబద్ధతతో వ్యవహరించలేదని అన్నారు. కాంగ్రెస్​ విడుదల చేసిన మేనిఫెస్టోలో న్యూయార్క్, థాయ్​లాండ్​ల చిత్రాలు పొందుపరిచారని మండిపడ్డారు. కాంగ్రెస్​పార్టీ రాకముందు, లేకముందు కూడా దేశంలో పలువురు ప్రముఖులు, పలు సంస్థలు ఏర్పాటయ్యాయని పేర్కొన్నారు. ప్రతీ ఒక్క అంశాన్ని నెహ్రూతో ముడిపెట్టి స్వాతంత్ర్యం తీసుకువచ్చింది తామేనని కాంగ్రెస్​ గొప్పలకు పోతోందన్నారు. 1930లోనే సివి.రామన్​ నోబెల్​ బహుమతిని సాధించారని, 1909లో ఇండియన్​ ఇన్​స్టిట్యూట్​ ఆఫ్​ సైన్స్​ ఏర్పాటైందని సుధాన్షు గుర్తు చేశారు. వీరు మేనిఫెస్టోలో విడుదల చేసిన చిత్రాలు న్యూయార్క్​లోని బఫె నదికి సంబంధించినవని పేర్కొన్నారు. మేనిఫెస్టోలో కూడా విదేశాల చిత్రాలు ఏర్పాటు చేయడం వీరి అవివేకానికి నిదర్శనమని కాంగ్రెస్​పై మండిపడ్డారు. కాగా కాంగ్రెస్​ మేనిఫెస్టోను మాజీ ఆర్థికమంత్రి పి.చిదంబరం అధ్యక్షతన రూపొందించడం విశేషం. అయితే ఈ మేనిఫెస్టోలోని చిత్రాలపై సామాజిక మాధ్యమాల్లో పలు విమర్శలు వస్తున్నాయి.