హస్తానికి ధరణి గుడ్ బై
కమల తీర్థం పుచ్చుకున్న ఎమ్మెల్యే విజయ. ప్రధాని లాంటి నేత అవసరం. అభివృద్ధికి అన్నామలై సహకారంతో ముందుకు..
చెన్నై: తమిళనాడులో హస్తం పార్టీకి పెద్ద షాక్ తగిలింది. ఆ పార్టీ ఎమ్మెల్యే విజయధరణి బీజేపీ తీర్థం పుచ్చుకుంది. విజయధరణి న్యూఢిల్లీలోని బీజేపీ కార్యాలయంలో శనివారం బీజేపీ రాష్ర్ట అధ్యక్షుడు కె.అన్నామలై కండువాకప్పి ఆమెను పార్టీలోకి ఆహ్వానించారు. ఎమ్మెల్యే విజయధరణి రాకతో పార్టీ మరింత బలోపేతం చేస్తారని ఆశిస్తున్నట్లు పేర్కొన్నారు.
ఈ సందర్భంగా పార్టీలో చేరిన ఎమ్మెల్యే విజయధరణి మాట్లాడుతూ.. తమిళనాడు బీజేపీ అధ్యక్షుడు అన్నామలై ఆధ్వర్యంలో పార్టీలో చేరడం,రాష్ర్ట అభివృద్ధికి తోడవడం సంతోషంగా భావిస్తున్నట్లు తెలిపారు. దేశానికి ప్రధానమంత్రి నరేంద్ర మోదీ లాంటి చరిష్మా ఉన్న నాయకుడు ఎంతో అవసరమన్నారు. కాంగ్రెస్ పార్టీలో అంతర్గత కలహాలు ఎక్కువని, దేశ భవిష్యత్తు, అభివృద్ధిపై ఆలోచన లేదని ధరణి పేర్కొన్నారు. తన రాజకీయ జీవితం కాంగ్రెస్ తోనే ప్రారంభించానని ఆమె తెలిపారు. ప్రధాని మోదీ దేశాభివృద్ధికి చేస్తున్న ప్రయత్నాలను చూసే బీజేపీలో చేరాలని నిర్ణయించినట్లు తెలిపారు. తాను పార్టీ మారడం మొదటిసారి అని అన్నారు.
పెరుంతగైతో విబేధాలతోనే పార్టీ వీడిన విజయధరణి..
విజయధరణి 2021లో కన్యాకుమారి నుంచి కాంగ్రెస్ తరఫున శాసనసభకు ఎన్నికయ్యారు. కాంగ్రెస్ పార్టీలో సీనియర్ నేత సెల్వ పెరుంతగైతో ఉన్న విబేధాల కారణంగా ఆమె పలుమార్లు మనస్తాపానికి గురయ్యారు. పెరుంతగై రాష్ర్ట అధ్యక్షుడిగా ఎన్నికకావడంతో ఆమె కాంగ్రెస్ నుంచి తప్పుకోవాలన్న నిర్ణయాన్ని తీసుకున్నట్లు సమాచారం. ఏది ఏమైనా ఈమె బీజేపీలో చేరడం హస్తం పార్టీకి రుచించడం లేదు.
