ఎల్ ఎంవీ డ్రైవర్లకు సుప్రీం ఊరట
Supreme relief for LMV drivers
డ్రైవర్లే ప్రమాదానికి కారణమన్న డేటా లేదు
జీవనోపాధికి సంబంధించినది
సుప్రీం తీర్పుపై ఎల్ ఎంవీ డ్రైవర్ల హర్షం
నా తెలంగాణ, న్యూ ఢిల్లీ: లైట్ మోటార్ వెహికిల్ లైసెన్స్ హోల్డర్లు 7500 కేజీల వరకు బరువున్న రవాణా వాహనాలను నడిపేందుకు అర్హులేనని సుప్రీంకోర్టు కీలక తీర్పునిచ్చింది. పలు ఇన్సూరెన్స్ సంస్థలు క్లెయిమ్ లు చెల్లించే విషయమై వినియోగదారుల కోర్టుల ఇచ్చిన తీర్పులపై సుప్రీంను ఆశ్రయించారు. ఈ పిటిషన్ పై బుధవారం సుప్రీం కోర్టు ఐదుగురు న్యాయమూర్తుల రాజ్యాంగ ధర్మాసనం విచారణ చేపట్టింది. ప్రమాదాలు పెరిగేందుకు ఎల్ ఎంవీ లైసెన్స్ దారులే కారణమని నిరూపించే డేటా ఏదీ లేదని తెలిపింది. ఈ సమస్య డ్రైవర్ల జీవనోపాధికి సంబంధించినదని న్యాయమూర్తులు అన్నారు. ఎల్ ఎంవీ డ్రైవింగ్ లైసెన్స్ హోల్డర్ల ద్వారా నడపబడుతున్న వాహన ప్రమాద కేసుల్లో బీమా క్లెయిమ్ లు వివాదాలకు దారి తీసింది. పరిహారం చెల్లించాల్సిందేనని ట్రిబ్యునళ్లు ఇన్సూరెన్స్ సంస్థలను ఆదేశిస్తున్నాయి. దీంతో ఈ వివాదం కాస్త సుప్రీంకోర్టుకెక్కింది. ఈ తీర్పుతో ఎల్ ఎంవీ డ్రైవింగ్ లైసెన్స్ కలిగిన డ్రైవర్లకు ఊరట లభించనుంది. సుప్రీం తీర్పు తమకు అనుకూలంగా రావడంలో ఎల్ ఎంవీ డ్రైవర్లు హర్షం వ్యక్తం చేస్తున్నారు.
సుప్రీంకోర్టు నిర్ణయంతో 7500 కేజీల బరువున్న రవాణా వాహనాలను ఎల్ ఎంవీ డ్రైవర్లు నడుపుకోవచ్చు. దీంతో ఇటు డ్రైవర్ల జీవనోపాధికి ఢోకా ఉండదు. మరోవైపు ప్రమాదాలు, బీమా క్లైయిమ్ లలో స్వల్ప మార్పులు చోటు చేసుకుంటే ఆయా సంస్థలకూ చట్టపరమైన ఇబ్బందులు తప్పనున్నాయి. గతంలో ఈ వాహనాలను నడిపితే, అధికారులో, పోలీసులో జరిమానాలు విధించేవారు. ప్రమాదాలకు గురైతే చట్టపరంగా డ్రైవర్లకు, అధికారులకు, పోలీసులకు, బీమా క్లైయిమ్ సంస్థలకూ తలనొప్పిగా పరిణమించేది. ఏది ఏమైనా ఎల్ఎంవీ తీర్పు ఇరువురికి ఆమోదయోగ్యంగా నిలించిందనే అభిప్రాయాలు వ్యక్తం అవుతున్నాయి.
