ఢిల్లీ మెట్రోపై విద్రోహ కోణం?

పలు సేవలకు అంతరాయం
ప్రయాణికులకు తీవ్ర ఇబ్బందులు
విచారణ చేపట్టామన్న అధికారులు
నా తెలంగాణ, న్యూ ఢిల్లీ: దేశంలోని వివిధ ప్రాంతాల్లో రైళ్లపై విధ్వంసాలు, దాడుల తరువాత ఢిల్లీ మెట్రోపై భారీ కుట్ర కోణం జరుగుతోందా? ఈ నేపథ్యంలో సోమవారం ఢిల్లీ మెట్రో సిగ్నలింగ్​ వ్యవస్థను దెబ్బతీసేందుకు సంఘ విద్రోహ శక్తులు ప్రయత్నించాయా? అంటే అవుననే అనిపిస్తుంది. ఢిల్లీ మెట్రో హైదర్​ పూర్​ బద్లీ – జహంగీర్​ పురి స్టేషన్​ ల మధ్య ఉన్న సిగ్నలింగ్​ కేబుల్​ ను గుర్తు తెలియని వ్యక్తులు ధ్వంసం చేశారు. దీంతో అనేక మెట్రో సేవలపై ప్రభావం పడింది. రద్దీ సమయంలో కేబుల్​ వ్యవస్థను ధ్వంసం చేయడంతో ప్రయాణికులు తీవ్ర ఇబ్బందులు ఎదుర్కొన్నారు. 
సిగ్నలింగ్​ కేబుల్​ వ్యవస్థను గుర్తు తెలియని వ్యక్తులు ధ్వంసం చేయడం నిజమేనని మెట్రో రైల్​ అధికారులు వివరించారు. దీనిపై సమగ్ర విచారణ చేపడుతున్నామన్నారు. సమాచారం అందిన వెంటనే కేబుల్​ వ్యవస్థను సరిచేసి సమస్యను పరిష్కరించామని తెలిపారు. ఈ లోపు మెట్రో లైన్​ సేవలను అంతరాయం ఏర్పడిందని తెలిపారు. అయితే ఇది ఆకతాయిలు చేసిన పనా? సంఘ విద్రోహ శక్తుల పనా? లేక ఉగ్రకోణం ఏదైనా ఉందా? అనేది తెలియాల్సి ఉంది. డీఎంఆర్​సీ అధికారులు ఈ విషయంపై పోలీసులకు ఫిర్యాదు చేశారు.