రూ. 5 వేలకోట్ల సైబర్ మోసం
ఎట్టకేలకు నిందితుడి అరెస్ట్ వివరాలు వెల్లడించిన ఈడీ
న్యూఢిల్లీ: న్యూఢిల్లీ విమానాశ్రయంలో రూ. 5వేల కోట్ల సైబర్ మోసానికి పాల్పడిన నిందితుడిని ఈడీ అరెస్టు చేసింది. ఇతని కోసం ఎన్నో రోజులుగా ఉచ్చు బిగించగా ఎట్టకేలకు ఏప్రిల్ 3న అరెస్టు చేసినట్లు బుధవారం వెల్లడించింది. నిందితుడు పునీత్ కుమార్ ఆన్ లైన్ గేమింగ్, మనీలాండరింగ్ ద్వారా మోసాలకు పాల్పడ్డాడని ఈడీ తెలిపింది. అంతకుముందు ఇతను స్థాపించిన కాల్ సెంటర్ లో 12 మందిని కూడా పోలీసులు అరెస్టు చేసి విచారించారు. వీరి ద్వారానే నిందితుడి రాక సమాచారం అందినట్లు వెల్లడించారు. ఇతని కోసం గాలింపు చేపట్టగా భారత్ నుంచి నేపాల్ కు పారిపోయాడని తెలిపారు. వివిధ పథకాల పేరుతో సామాన్యులను మభ్యపెడుతూ డబ్బును పోగేసుకున్నాడని గుర్తించినట్లు తెలిపారు.
ఇతని గురించి విచారిస్తే భారీ స్కామ్ గుట్టురట్టయినట్లు వివరించారు. యూఏఈలో సర్వర్ లను ఉపయోగిస్తూ సిండికేట్ స్థాపించినట్లు గుర్తించామని పేర్కొంది. ఆన్ లైన్ గేమింగ్ ద్వారా రూ. 4978 కోట్లు ఆర్జించినట్లు పేర్కొంది. ఇప్పటికే ఈ కేసులో అనేకమందిని అరెస్టు చేసినట్లు వివరించింది. ప్రధాన నిందితుడు మాత్రం ఇప్పుడు చిక్కాడని వెల్లడించింది.
ప్రజలు లాభాలను ఆశిస్తూ ఇటువంటి మోసగాళ్ల బారిన పడవద్దని పోలీసులు సూచించారు. కొల్లగొట్టిన డబ్బునంతా దుబాయ్, సింగపూర్ లాంటి దేశాలకు పంపించినట్లు ఈడీ తెలిపింది.
కాగా మహారాజా గేమింగ్ స్కామ్ లో కూడా పలువురిని ఈడీ అరెస్టు చేసిన విషయం తెలిసిందే. ఈ స్కామ్ లో బడా సినీ ప్రముఖులకే వాటాలు దక్కడం మరో విశేషం.
