కేజ్రీ రాజీనామా చేయాలని బీజేపీ నిరసన

న్యూఢిల్లీ: మద్యం కుంభకోణంలో అరెస్టు అయి జైలులో ఉన్న సీఎం కేజ్రీవాల్​ వెంటనే రాజీనామా చేయాలని బీజేపీ ఆందోళన చేపట్టింది. బుధవారం ఆప్​ ఢిల్లీ కార్యాలయం వద్ద పెద్ద పెట్టున బీజేపీ నాయకులు, కార్యకర్తలు ఆందోళనకు దిగారు. దీంతో రంగంలోకి దిగిన పోలీసులు నాయకులను, కార్యకర్తలను అదుపు చేసేందుకు ప్రయత్నించారు. ఢిల్లీ బీజేపీ అధ్యక్షుడు వీరేంద్ర సచ్​ దేవా ఆధ్వర్యంలో నిరసనకు దిగారు. అదుపు చేసే క్రమంలో సచ్​ దేవాకు స్వల్ప గాయాలయ్యాయి. పోలీసులు నిరసన చేస్తున్న వారిని చెదరగొట్టేందుకు ప్రయత్నించారు. ఇందుకోసం వాటర్​ కెనాన్​ లను ప్రయోగించారు. ఈ సందర్భంగా పలువురిని పోలీసులు అరెస్టు చేశారు. 

ఆందోళన సందర్భంగా సచ్​ దేవా మాట్లాడుతూ.. సీఎం రాష్ర్ట పాలనను వదిలి జైలులో కూర్చున్నారని ఎద్దేవా చేశారు. ప్రజాపాలన ఎవరు చూడాలని ప్రశ్నించారు. అవినీతి, అక్రమాలకు దొంగసొమ్మును ముటగట్టుకొని భారీగా సంపాదించారని ఆరోపించారు. వెంటనే సీఎం రాజీనామా చేయకుంటే తీవ్ర పరిణామాలు తప్పవని హెచ్చరించారు. ఓ వైపు కోర్టులు కూడా సీఎంకు మొట్టికాయలు వేస్తున్నా ఆయనకు సిగ్గురావడం లేదని విమర్శించారు. మరోవైపు సుప్రీంకు వెళతామంటూ ఉత్తర కుమార ప్రగల్భాలు పలుకడం ఆయన అవివేకానికి నిదర్శనమన్నారు. ఎక్కడికి వెళ్లినా ఏ కోర్టులైనా అవినీతి, అక్రమాలకు పాల్పడిన వారిని వదిలేసినట్లు చరిత్రలో లేదని బీజేపీ అధ్యక్షుడు వీరేంద్ర సచ్​ దేవా అన్నారు.