రైతు ‘బంద్​’

బీఆర్‌ఎస్‌ ప్రభుత్వం 2018-19 వానాకాలం పంట సమయంలో రైతు బంధు పథకానికి శ్రీకారం చుట్టింది. తొలుత ఎకరానికి పంటకు రూ.4000 చొప్పున రెండు పంటలకు కలిపి రూ.8వేల చొప్పున చెల్లించింది. 2018-19 వానాకాలంలో 50.25లక్షల మంది రైతులకు 5236.29 కోట్లను అందజేసింది. ఆ తర్వాత పంటకు రూ.5వేలకు ప్రభుత్వం పెంచింది. అలా మొత్తంగా నిరుడు వానాకాలం వరకు రూ.72817.04 కోట్లను రైతులకు ఆర్థిక సాయాన్ని అందజేసింది. గత యాసంగి సీజన్‌కు కూడా రైతుబంధును విడుదల చేయాలని బీఆర్‌ఎస్‌ ప్రభుత్వం నిర్ణయించింది. కాంగ్రెస్‌ నేతల ఫిర్యాదుతో రైతు బంధు విడుదలకు కేంద్ర ఎన్నికల సంఘం అనుమతి ఇవ్వలేదు. ఆ తర్వాత అనుమతిచ్చినా వరుసగా బ్యాంకు సెలవులు రావడంతో ఆ నిధుల విడుదల సాధ్యం కాలేదు. అదే సమయంలో తాము  అధికారంలోకి వస్తే రైతుభరోసా పేరిట రూ.15వేలు ఇస్తామని కాంగ్రెస్‌ నేతలు ప్రచారంలో చెప్పారు. కానీ, అధికారంలోకి వచ్చినా అమలుకు మాత్రం ముందుకు రావడం లేదు. కాలయాపన చేస్తూ.. రైతు భరోసాపై అధ్యయనం కోసం క్యాబినెట్‌ సబ్‌ కమిటీని ఏర్పాటు చేసింది. తర్వాత ఆ కమిటీ అన్ని జిల్లాల్లో పర్యటించి కొన్ని రోజులు హడావుడి చేసింది. ప్రస్తుతం యాసంగి సీజన్‌ మొదలవుతున్నా.. ఇప్పటి వరకు రైతుభరోసాపై అతీగతి లేకుండా పోయింది. తాజాగా బోనసా.. రైతు బంధా.. రైతులు ఏదిచెబితే అదే ఇస్తామంటూ మంత్రి తుమ్మల చేసిన వ్యాఖ్యలను పరిశీలిస్తే రైతుబంధు అటకెక్కినట్టే అని స్పష్టమవుతున్నది.