రాహుల్​ క్షమాపణలు చెప్పాలి

కేంద్రమంత్రి శివరాజ్​ సింగ్​ చౌహాన్​ డిమాండ్​

నా తెలంగాణ, న్యూ ఢిల్లీ: పార్లమెంట్​ ఆవరణలో రాహుల్​ గాంధీ ఎంపీలను తోయడం పట్ల వెంటనే క్షమాపణ చెప్పాలని కేంద్రమంత్రి శివరాజ్​ సింగ్​ చౌహాన్​ డిమాండ్​ చేశారు. గురువారం ఎంపీ సారంగి, రాజ్​ పుత్​ లను రామ్​ మనోహర లోహియా ఆసుపత్రికి వెళ్లి పరామర్శించారు. వారి ఆరోగ్య పరిస్థితిపై వైద్యులను వివరాలు అడిగి తెలుసుకున్నారు. అనంతరం మీడియాతో మాట్లాడారు.రాహుల్​ ప్రవర్తన నాగరిక సమాజం ఊహించలేనిదన్నారు. ఈ రోజు పరిణామాలకు రాహుల్​, ఖర్గేలు క్షమాపణలు చెబుతారని అనుకున్నానని కానీ వారు తప్పు చేసింది గాక, బీజేపీనే ఫిర్యాదు చేసేందుకు పోలీస్​ స్టేషన్​ కు వెళ్లడం ఎంత దిగజారిన రాజకీయాలకు పాల్పడుతున్నారనేది అర్థమవుతుందని మండిపడ్డారు. మకర ద్వారం వద్ద బీజేపీ ఎంపీలు నిరసన తెలుపుతుండగా, భద్రతా సిబ్బంది కాంగ్రెస్​ ఎంపీలను మరో ద్వారం ద్వారా లోపలికి వెళ్లాలని సూచించారన్నారు. దీన్ని జీర్ణించుకోలేని రాహుల్​, ఖర్గేలు వాగ్వివాదానికి, తోపులాటలకు దిగి ఎంపీలను గాయపరిచారన్నారు. ఈ దాడులపై బీజేపీ కఠిన చర్యలు తీసుకుంటుందన్నారు. సీనియర్​ ఎంపీ ఐసీయూలో చికిత్స పొందుతున్నారని అన్నారు. అంతేగాక గిరిజన మహిళా ఎంపీపై రాహుల్​ అనుచిత ప్రవర్తనను కూడా హర్షించమని శివరాజ్​ సింగ్​ ఆగ్రహం వ్యక్తం చేశారు.