ఎంపీలను తోసేసిన రాహుల్
Rahul pushed the MPs
ఇద్దరు ఎంపీలకు తీవ్ర గాయాలు
సారంగి తలకు బలమైన గాయం
స్పృహ కోల్పోయిన ముఖేష్ రాజ్ పుత్
తనపై అరిచాడన్న మహిళా ఎంపీ
చైర్మన్ కు లిఖిత పూర్వక ఫిర్యాదు
ఎఫ్ ఐఆర్ నమోదుకు బీజేపీ
నా తెలంగాణ, న్యూ ఢిల్లీ: గత కొన్ని రోజులుగా పార్లమెంట్ లో కాంగ్రెస్, విపక్ష ఇండి కూటమి పార్టీలు సభలను సజావుగా జరగనీయడం లేదు. ప్రతీ అంశంపై కేంద్ర ప్రభుత్వాన్ని ఇరకాటంలోకి నెట్టాలని చూస్తున్నాయి. వారి వ్యవహారశైలిని గమనిస్తే కావాలనే కాంగ్రెస్ పార్టీ ఇలాంటి చర్యలకు పాల్పడుతుందనేది స్పష్టం అవుతుంది. రాహుల్, ప్రియాంక, ఖర్గేలు మిగతా పార్టీల ఎంపీలతో కలిసి గురువారం తీవ్ర రభస సృష్టించేందుకు సిద్ధమయ్యారు. పార్లమెంట్ ప్రాంగణం బయట ఎంపీలనూ తోసేశారు.
బీజేపీ ఎంపీ సారంగి, ముఖేష్ రాజ్ పుత్ లను రాహుల్ గాంధీ తోసేసిన ఆరోపణలు కలకలం రేపుతున్నాయి. నాగాలాండ్ బీజేపీ మహిళా ఎంపీ ఫాంగ్నోన్ రాహుల్ గాంధీ తనను నెట్టివేశారని రాజ్యసభ చైర్మన్ జగదీప్ ధన్ ఖర్ కు ఫిర్యాదు చేశారు. పార్లమెంట్ లోని గురువారం నిరసన చేపట్టిన కాంగ్రెస్ ఎంపీలు అనంతరం మకర ద్వారం ద్వారా పార్లమెంట్ లోకి ప్రవేశించేందుకు ప్రయత్నించారు. బీజేపీ సభ్యులు కూడా కాంగ్రెస్ సభ్యులతోపాటు పోటాపోటీ నినాదాలు చేశారు. దీంతో తోపులాట చోటు చేసుకుంది. ఎంపీ సారంగి తలకు బలమైన గాయమైంది. మరో ఎంపీ ముకేష్ రాజ్ పుత్ లను వెంటనే రామ్ మనోహర్ లోహియా ఆసుపత్రికి తరలించి చికిత్సనందింప చేస్తున్నారు. వీరిని పలువురు బీజేపీ ఎంపీలు, కేంద్రమంత్రులు పరామర్శించారు. సారంగి, రాజ్ పుత్ లకు ఎనిమిది మంది వైద్యుల బృందం చికిత్సనందిస్తుంది. ఇద్దరినీ ఐసీయూలో చేర్చి చికిత్స అందిస్తున్నారు. ఎంపీలకు రక్తపోటు పెరిగిందని వైద్యులు తెలిపారు. సారంగి నుదుటిపై కుట్లు వేశామన్నారు.
బీజేపీ ఎంపీ సారంగి: రాహుల్ గాంధీ తోసేశారు. దీంతో వేరే ఎంపీ తనపై పడగా తాను మెట్లపై నుంచి కిందపడి గాయపడ్డాను.
ఎంపీ ఫాంగ్నోన్: తాము సభ బయట నిరసన వ్యక్తం చేస్తుంటే రాహుల్ గాంధీ తనకు అత్యంత దగ్గరగా వచ్చి అరవడం మొదలుపెట్టారు. దీంతో తాను తీవ్ర అసౌకర్యానికి గురయ్యాను. మహిళా ఎంపీనని కూడా చూడకుండా తనవద్దకు వచ్చి అరవడం ఆయన అవివేకానికి నిదర్శనం. ఈ విషయాన్ని లేఖ ద్వారా సభాపతికి ఫిర్యాదు చేశాను.
ధర్మేంద్ర ప్రధాన్: రాహుల్ గాంధీ బలవంతంగా నెడుతూ పార్లమెంట్ లోకి ప్రవేశించేందుకు ప్రయత్నించారు. దీంతో ఎంపీలు కిందపడిపోయారు. సారంగికి తీవ్ర గాయాలు కాగా, ముఖేష్ రాజ్ పుత్ తీవ్రంగా గాయపడ్డారు. ఇద్దరికి తలకు గాయాలై రక్తస్రావమైంది.
జేపీ నడ్డా: బీజేపీ ఎంపీలపై రాహుల్ గాంధీ దురుసు ప్రవర్తన అప్రజాస్వామ్య రీతిలో ఉంది. అంతేగాక మహిళా ఎంపీకి దగ్గరగా వెళ్లి అరవడం, నెట్టేందుకు ప్రయత్నించడం దారుణం. కాంగ్రెస్ మూడోసారి అధికారం కోల్పోయిందనే దు:ఖంలో పార్లమెంట్ లో సభలను అడ్డుకుంటోంది. ఇష్టం వచ్చినట్లు ప్రవర్తిస్తుంది.
రాహుల్ గాంధీ ఎంపీలపై ప్రవర్తించిన తీరును ఖండిస్తూ బీజేపీకి చెందిన ఎంపీలు బాన్సురి స్వరాజ్, అనురాగ్ ఠాకూర్ లు ఎఫ్ ఐఆర్ నమోదు చేయాలని పార్లమెంట్ స్ర్టీట్ పోలీస్ స్టేషన్ కు చేరుకున్నారు.
గజేంద్రసింగ్ షెకావత్: రాహుల్ చర్యలు ఆమోదయోగ్యం కావు. ప్రజాస్వామ్యంలో సైద్ధాంతికి విభేదాలు ఉండొచ్చు. కానీ శారీరకంగా హింసకు దిగడం అసమంజసం.
అశ్వినీ వైష్ణవ్: కాంగ్రెస్ చరిత్ర మొత్తం దేశం ముందు బట్టబయలవుతుండడంతో ఏం చేయాలో పాలుపోని కాంగ్రెస్, రాహుల్ గాంధీ నిరసనల పేరిట పార్లమెంట్ లో రాద్ధాంతం సృష్టిస్తూ దేశ ప్రజలను తప్పుదోవ పట్టిస్తున్నారు. ఈ రోజు చట్టసభ ప్రాంగణంలోనే ఎంపీలను తోసేశారు. ఈయన పార్లమెంట్ కు ఇచ్చే గౌరవం ఇదేనా? డా. బాబా సాహెబ్ అంబేద్కర్ ను అవమానించి ఎవరన్నది దేశం మొత్తానికి తెలుసు.
రాహుల్ గాంధీ చర్యలపై కేంద్ర హోంశాఖ మంత్రి అమిత్ షా సీరియస్ గా తీసుకున్నారు. వెంటనే మంత్రులు పీయూష్ గోయల్, కిరణ్ రిజూజు, స్పీకర్ ఓంబిర్లా, జగదీప్ ధన్ ఖర్ లతో భేటీ అయ్యారు.
కాగా గాయపడిన సారంగి, రాజ్ పుత్ లతో ప్రధాని నరేంద్ర మోదీ ఫోన్ లో మాట్లాడారు. వారి ఆరోగ్యపరిస్థితిపై వాకబు చేశారు. ఘటనను తీవ్రంగా ఖండించారు. తోపులాట ఘటనపై కఠిన చర్యలు తీసుకోవాలని పార్టీ వర్గాలకు సూచించారు.
