సైబర్ భద్రత లేకుండా దేశ ప్రగతి అసాధ్యం
Progress of the country is impossible without cyber security
ఐదువేల నిపుణులను రంగంలోకి దింపాలని కేంద్రం యోచన
కేంద్రహోంశాఖ మంత్రి అమిత్ షా
నా తెలంగాణ, న్యూ ఢిల్లీ: భారత్ లో రోజురోజుకు సైబర్ కార్యకలాపాలు విస్తృతం అవుతున్నందున ఈ రంగంలో ఐదువేల మంది నిపుణులను భద్రత కోసం సిద్ధం చేయాలని కేంద్ర ప్రభుత్వం యోచిస్తోందని కేంద్ర హోంశాఖ మంత్రి అమిత్ షా అన్నారు. సైబర్ భద్రత లేకుండా దేశ ప్రగతి అసాధ్యమన్నారు. సైబర్ సెక్యూరిటీ జాతీయ భద్రతలో అంతర్భాగమని షా పేర్కొన్నారు. మంగళవారం ఇండియన్ సైబర్ క్రైమ్ కో ఆర్డినేషన్ సెంటర్ (14సీ) మొదటి వ్యవస్థాపక దినోత్సవ వేడుకల్లో న్యూ ఢిల్లీలో కేంద్రమంత్రి పాల్గొని ప్రసంగించారు.
సాంకేతికత మానవాళికి ఒక వరంలాంటిదన్నారు. ఆర్థిక వ్యవస్థను పెంపొందించుకునేందుకు అనేక విధానాలను సులభతరం చేయగలిగామన్నారు. అదేసమయంలో సైబర్ బెదిరింపులు కూడా ఎక్కువయ్యాయని తెలిపారు. వీటిని నివారణకు కూడా ప్రభుత్వం కఠిన చర్యలు తీసుకుంటుందన్నారు. కేంద్రం చర్యలకు రాష్ట్రాలు సైబర్ రిజిస్ట్రీలను ఏర్పాటు చేస్తే, దానికి పరిమితులు ఉంటాయని అమిత్ షా తెలిపారు.
సైబర్ నేరాలలో అనుమానిత రిజిస్ట్రీలను ఏర్పాటు చేసుకోవాలని షా సూచించారు. భవిష్యత్ లో నేరాలను అరికట్టేందుకు ఈ విధానం దోహదపడుతుందన్నారు. బాధితులకు నిరంతరం సైబర్ భద్రతపై అవగాహన కల్పించడమే ఈ సమావేశం లక్ష్యమన్నారు. 14 సీ ద్వారా దేశ ప్రజలకు అవగాహన, 72 టీవీ చానళ్లు, 190 ఎఫ్ ఎం చానళ్ల ద్వారా ప్రజలకు సైబర్ నేరాలపై అవగాహన కల్పించేందుకు ప్రచారాన్ని చేపట్టామని తెలిపారు. దేశంలోని ప్రతీ పౌరునికి సైబర్ నేరాల పట్ల అప్రమత్తత అవసరమని షా స్పష్టం చేశారు.
సైబర్ నేరాలపై 1930 టోల్ ఫ్రీ నెంబర్ మరింత జనాదరణ పొందాల్సిన ఆవశ్యకతను గుర్తించామన్నారు. దేశంలో 46 శాతం లావాదేవీలు డిజిటల్ మాధ్యమంగానే జరుగుతున్నాయని తెలిపారు. సైబర్ నేరగాళ్లు ఉపయోగించే వెబ్ సైట్లు, సోషల్ ఖాతాలు, మొబైల్ యాప్ లు, బ్యాంకు ఖాతాలను బ్లాక్ చేశామని తెలిపారు.
14 సీ సైబర్ భద్రత విభాగం 2018 అక్టోబర్ 5న హోంమంత్రిత్వ శాఖ ఆధ్వర్యంలో ఏర్పాటైంది. సైబర్ నేరాలపై అప్రమత్తత, నేరాలు జరగకుండా చూసుకునే విధానాలను ప్రోత్సహించడం, నేరాలు జరిగాక ఎటువంటి చర్యలు తీసుకోవాలనే లక్ష్యాలతో ఈ విభాగాన్ని కేంద్ర ప్రభుత్వం ఏర్పాటు చేసింది.
