రష్యాకు ప్రధాని మోదీ.. బుధవారం 16వ బ్రిక్స్​ సదస్సు

జీ జిన్​ పింగ్​ తో భేటీ?
భారత్​ తరఫున ప్రతినిధి బృందానికి కేంద్రమంత్రి జై శంకర్​ నాయకత్వం
అమెరికాలో మొదలైన గుబులు

మాస్కో: ప్రధాని నరేంద్ర మోదీ బ్రిక్స్​ 16వ సదస్సులో పాల్గొనేందుకు మంగళవారం రష్యాలోని కజాన్​ చేరుకున్నారు. ఆయనకు ఘన స్వాగతం లభించింది. గత నాలుగు నెలల్లో రష్యాలో ప్రధాని పర్యటన రెండోసారి కావడం గమనార్హం. మంగళవారం సాయంత్రం బ్రిక్స్​ నేతలో కలిసి పలు విషయాలపై చర్చించనున్నారు. సాయంత్రం విందులో పాల్గొంటారు. పుతిన్​ తోనూ భేటీ అవుతారు. అనధికారిక చర్చలు నిర్వహించనున్నారు.

బుధవారం నిర్వహించనున్న బ్రిక్స్​ సమావేశంలో ప్రధాని మోదీ పాల్గొంటారు. ఈ సదస్సును రెండు సెషన్లుగా విభజించారు. ఒకటి క్లోజ్డ్​ ప్లీనరీ కాగా ఓపెన్​ ప్లీనరీని నిర్వహించనున్నారు. ఈ సమావేశంలో పలుదేశాలతో మోదీ ద్వైపాక్షిక చర్చలు జరపనున్నారు. రెండేళ్ల తరువాత చైనా అధ్యక్షుడు జీ జిన్​ పింగ్​ తో కూడా భేటీ నిర్వహిస్తారని విదేశాంగ శాఖ ద్వారా సమాచారం అందింది. లడఖ్​ లో పెట్రోలింగ్​, భారత్​, చైనాల మధ్య ఒప్పందం కుదిరాక ఈ చర్చలకు అత్యంత ప్రాధాన్యత ఏర్పడింది. మోదీ – జీన్​ పింగ్​ 2022లో చివరిసారిగా ఇండోనేషియా బాలిలో జరిగిన జీ–20 సమ్మిట్​ లో కలిశారు. 

కాగా 23న బ్రిక్స్​ సదస్సులో పాల్గొనేందుకు విదేశాంగ శాఖ మంత్రి జై శంకర్​ వెళ్లనున్నారు. భారత బృందానికి నాయత్వం వహిస్తారు. ఈ సదస్సులో మొత్తం 28 దేశాలు, ఐదు అంతర్జాతీయ సంస్థలు పాల్గొంటున్నాయి. సదస్సులో కజన్​ డిక్లరేషన్​ ను జారీ చేయనున్నారు. కజాన్​ లో భారత్​ నూతన కాన్సులేట్​ ను ఏర్పాటు చేయనుంది. బ్రిక్స్​ దేశాల సదస్సుతో అమెరికా గుండెల్లో రైళ్లు పరిగెడుతున్నాయి. ఆసియా, పసిఫిక్​ దేశాలన్నీ ఏకమైతే ప్రపంచ పెద్దన్నగా చెలామణి అవుతున్న అమెరికా ప్రాధాన్యం తగ్గే అవకాశం ఉండడంతో ఈ సదస్సుపై ఒక కన్నేసి ఉంచింది.