ప్రధాని మోదీకి పాక్ ఆహ్వానం
ఎస్ సీవో సదస్సుకు హాజరు కావాలని పిలుపు
నా తెలంగాణ, న్యూ ఢిల్లీ: భారత ప్రధాని నరేంద్ర మోదీ పాక్ వెళ్లనున్నారా?! భారత్ తో పాక్ సత్సంబంధాలకు ఉవ్విళూరుతోంది. ఈ నేపథ్యంలో పాక్ లో అక్టోబర్ నెలలో జరిగే షాంఘై కో ఆపరేషన్ ఆర్గనైజేషన్ (ఎస్ సీవో) సదస్సుకు ప్రధాని నరేంద్ర మోదీకి ఆహ్వానం అందినట్లు గురువారం అధికార వర్గాలు వెల్లడించారు.
మరోవైపు పాక్ ఉగ్రవాదంపై చర్యలు తీసుకోవాలని, ఆ దారిని విడనాడితే గాని ఇరుదేశాల మధ్య సత్సంబంధాలు సాధ్యపడవని అనేకమార్లు భారత్ స్పష్టం చేసింది. ఈ నేపథ్యంలో పాక్ ఆహ్వానంపై సర్వత్రా ఆసక్తి నెలకొంది. అక్టోబర్ 15–16 తేదీల్లో ఈ శిఖరాగ్ర సమావేశం పాక్ లో జరగనుంది. ఈ సమావేశానికి హాజరు కావాలని పాక్ విదేశాంగ శాఖ ప్రతినిధి ముంతాజ్ మోదీని ప్రభుత్వం తరఫున ఆహ్వానించారు. అయితే ఈ సమావేశంలో భారత్ తరఫున ఎవరు హాజరవుతారనే నిర్ణయాన్ని భారత్ స్పష్టం చేయలేదు.
భారత్, చైనా, రష్యా, పాక్, కజకిస్తాన్, కిర్గిస్థాన్, తజికిస్థాన్, ఉజ్భెకిస్తాన్ లు ఎస్ సీవోలో భాగస్వామ్య దేశాలు. ఆర్థికం, సామాజిక–సాంస్కృతిక, మానవతా సహకారంపై ఈ సమావేశంలో చర్చించనున్నారు.
