రెండో విడతకు ఝార్ఖండ్​ సిద్ధం

రాంచీ: ఝార్ఖండ్​ రెండో (చివరి) విడత 38 స్థానాల ఎన్నికలకు అంతా సిద్ధమైంది. బుధవారం ఎన్నికలు నిర్వహించనున్నారు. ఉదయం 7 గంటల నుంచి పోలింగ్​ మొదలై సాయంత్రం 5 గంటల వరకూ కొనసాగనుందని ఈసీ ప్రకటించింది.

పోలింగ్​ సందర్భంగా బస్సులు, రైళ్లు, వాహనాల ద్వారా సిబ్బందిని గమ్యస్థానాలకు పంపినట్లు అధికారులు తెలిపారు. 38 స్థానాలకు గాను 14,218 పోలింగ్​ కేంద్రాలను ఏర్పాటు చేశామన్నారు. ఈవీఎంలను తీసుకువెళ్లే అన్ని వాహనాలకు జీపీఎస్​ తో అనుసంధానించి భద్రత మధ్య తరలించామన్నారు.

భద్రత కోసం 585 కంపెనీల కేంద్ర పారామిలటరీ బలగాలు, 60 కంపెనీల జేఏపీ (ఝార్ఖండ్​ ఆర్మ్​ డ్​ ఫోర్స్​), 30వేలమంది పోలీసులు, హోంగార్డులను మోహరించామని తెలిపారు. ఉదయం 6 గంటలకే మాక్​ పోలింగ్​ నిర్వహిస్తామని 7 గంటల నుంచి పోలింగ్​ ప్రారంభమవుతుందని తెలిపారు. 38 స్థానాలకు గాను 31 స్థానాల్లో కొన్ని అత్యంత సమస్యాత్మకమైన పోలింగ్​ కేంద్రాలను గుర్తించామన్నారు.

ఇక్కడ బందోబస్తును పటిష్టం చేశామని తెలిపారు. ఇక్కడ సాయంత్రం 4 గంటల వరకూ పోలింగ్​ నిర్వహిస్తామన్నారు. పట్టణ ప్రాంతాల్లో 2414, గ్రామీణ ప్రాంతాల్లో 11,804 పోలింగ్​ స్టేషన్లను ఏర్పాటు చేశామన్నారు. 48 ప్రత్యేక బూత్​ లను ఏర్పాటు చేశామని తెలిపారు. 239 బూత్​ లు పూర్తిగా మహిళా సిబ్బందే నిర్వహిస్తారని తెలిపారు. 22 పోలింగ్​ కేంద్రాల ఏర్పాట్లును వికలాంగులు, 26 పోలింగ్​ కేంద్రాల్లో ఏర్పాట్ల బాధ్యతను యువతకు అప్పగించామన్నారు. ఓటింగ్​ ప్రక్రియ మొత్తం వెబ్​ కాస్టింగ్​ ద్వారా పర్యవేక్షించనున్నట్లు ఈసీ అధికారులు స్పష్టం చేశారు. 

కాగా రెండో దశలో 528 మంది అభ్యర్థులు బరిలో ఉండగా, 1,23,58,195 మంది ఓటు హక్కును వినియోగించుకొని అభ్యర్థుల భవితవ్యాన్ని తేల్చనున్నారు.