దేవాలయాల్లో గ్రంథాలయాలు ఏర్పాటు ఇస్రో చీఫ్​ సోమనాథ్​ సూచన

తిరువనంతపురం: దేవాలయాలలో గ్రంథాలయాలు ఏర్పాటు చేయడం వల్ల మరింత యువతను సన్మార్గంలో నడిపేందుకు అవకాశం ఏర్పడుతుందని ఇస్రో చీఫ్​ సోమనాథ్​ అన్నారు. శనివారం తిరువనంతపురంలోని ఉదియనూర్​ ఆలయంలో అవార్డు వేడుకల్లో సోమనాథ్​ పాల్గొని ప్రసంగించారు. లైబ్రరీల ఏర్పాటు వల్ల దేవాలయాలను సందర్శించే యువత సంఖ్య కూడా పెరుగుతుందన్నారు. ఆ దిశగా దేవాలయ నిర్వాహకులు కృషి చేయాలని తెలిపారు. చాలామంది నిరుపేద విద్యార్థులకు కూడా గ్రంథాలయాల ఏర్పాటు వల్ల చదువుకునే అవకాశం లభిస్తుందన్నారు. దేశంలో జరుగుతున్న పోటీ పరీక్షల నేపథ్యంలో కూడా ఈ గ్రంథాలయాలకు ఆదరణ కూడా పెరిగే అవకాశం ఉందని సోమనాథ్​ స్పష్టం చేశారు. ప్రజలు కేవలం నామస్మరణ చేయడానికే కాకుండా సమాజాన్ని మార్చాలనే లక్ష్యంతో ఆలయానికి వెళ్లాలని సోమనాథ్ విజ్ఞప్తి చేశారు.