శక్తివంతమైన ప్రజాస్వామ్యం మనది శాంతికి చిహ్నం భారత్

నా తెలంగాణ, న్యూ ఢిల్లీ: భారత్​ శక్తివంతమైన ప్రజాస్వామ్య దేశమని, అభివృద్ధిలో స్థిరత్వం, శాంతికి సంకేతం భారత్​ అని ఉపరాష్ర్టపతి జగదీప్​ ధంకర్​ అన్నారు. 

బుధవారం 19వ సిఐఐ ఇండియా-ఆఫ్రికా బిజినెస్ కాన్‌క్లేవ్ ప్రారంభ సెషన్‌లో బిల్డింగ్ ఎ ఫ్యూచర్ అనే అంశంపై ఆయన ప్రసంగించారు. మానవాళి శ్రేయస్సుకు అందరి భాగస్వామ్యంతో బంగారు భవిష్యత్​ ను సృష్టించుకునే అవసరం ఉందని ఉపరాష్ట్రపతి తెలిపారు. ప్రస్తుతం ప్రపంచంలో వాతావరణ మార్పులు మానవాళికి అతిపెద్ద ముప్పుగా అభివర్ణించారు. ఈ సవాలును ఎదుర్కోవడంపై అన్ని దేశాలు సమిష్ఠిగా దృష్టి పెట్టాలని కోరారు. 

భారత్​–ఆఫ్రికా మధ్య లోతైన సంబంధాలపై దృష్టిని సారించి పరస్పర ఆకాంక్షల ద్వారా సంక్లిష్ట సవాళ్లను పరిష్కరించుకోవాల్సిన అవసరం ఉందన్నారు. గ్లోబల్​ సౌత్​ పురోగతిని ఇరుదేశాల బంధాలు మరింత బలోపేతం చేస్తాయన్నారు. 

భారత్​ నిర్వహించిన జీ–20లో ఆఫ్రికన్​ యూనియన్​ ను సభ్యదేశంగా చేసుకోవడం గర్వకారణమని ఉపరాష్ర్టపతి తెలిపారు. ఐక్యరాజ్యసమితిలో ఆఫ్రికాకు భారత్​ స్వరంగా మారడం సంతోషకరమన్నారు. 

భారత్​ కు నమీబియా నుంచి చిరుతలను అందించి జీవ వైవిధ్యాన్ని పున:సృష్టించేందుకు సహాయం చేసినందుకు కృతజ్ఞతలు తెలిపారు. ఈ పరిణామం ఇరుదేశాల్లోని బంధాలను మరింత బలోపేతం చేసిందన్నారు. 

ప్రపంచంలోని దేశాలతో భాగస్వామ్యాన్ని నిర్మించుకోవడంలో భారత్​ ఎన్నటికీ ముందువరుసలో ఉంటుందని ఉపరాష్ర్టపతి జగదీప్​ ధంకర్​ తెలిపారు.