భారత్​ది బలమైన సరిహద్దు విధానం

న్యూఢిల్లీ: ప్రధాని మోదీ నేతృత్వంలో భారత ప్రభుత్వం బలమైన సరిహద్దు విధానాన్ని అవలంభిస్తోందని ఇదే నిర్ణయం చైనాకు చికాకు తెప్పిస్తుందని కేంద్రమంత్రి కిరణ్​ రిజుజు అన్నారు. అరుణాచల్​లోని 30 ప్రాంతాలకు పేర్లు పెట్టడాన్ని తప్పుబట్టారు. 1962 నాటి భారత్​ కాదని గుర్తుంచుకోవాలని అన్నారు. మంగళవారం చైనా కొత్త పేర్లపై కౌంటర్​ అటాక్​కు మంత్రి రిజుజు దిగారు. బెదిరిస్తే భయపడేందుకు భారత్​ ప్రస్తుతం బలహీన దేశం కాదన్నారు. సరిహద్దు విషయంలో నిక్కచ్చిగా వ్యవహరించే సత్తా భారత్​కు ఉందన్నారు. సరిహద్దుల్లో భారత్​ వేగవంతమైన అభివృద్ధి పనులు చేపడుతుంటే చూసి చైనాకు కళ్లు కుడుతున్నాయన్నారు. అందుకే అంతర్జాతీయంగా వివాదాలకు తెరలేపాలని చైనా భావిస్తోందన్నారు. కానీ చైనా దుశ్చర్యలపై ఎప్పటికప్పుడు తాము అంతర్జాతీయ సమాజం ముందు నిలదీస్తూనే ఉన్నామని తెలుసుకోవాలని మంత్రి రిజుజు తెలిపారు. గతంలో కాంగ్రెస్​ ప్రభుత్వం సరిహద్దు సమస్యలను పట్టించుకోకపోవడం వల్లే ప్రస్తుతం ఈ దుస్థితి తలెత్తిందన్నారు. 2014 తరువాత వచ్చిన బీజేపీ, ప్రధాని మోదీ  ప్రభుత్వం సరిహద్దు విషయంలో అన్ని జాగ్రత్తలు తీసుకుంటుందని స్పష్టం చేశారు. సరిహద్దు ప్రాంతాల్లో అభివృద్ధి చేయకుండా చుట్టుపక్క దేశాలు సునాయాసంగానే ఆక్రమించుకునేలా గతంలో కాంగ్రెస్​ చర్యలు ఉన్నాయన్నారు. కానీ సరిహద్దుల్లో సౌకర్యాల కల్పనతో చైనాకు చుక్కలు కనిపిస్తున్నాయన్నారు. సరిహద్దులోని ఏ ఒక్క ప్రాంతాన్ని తాము వదులుకునేందుకు సిద్ధంగా లేమని మంత్రి కిరణ్​ రిజుజు స్పష్టం చేశారు.