హిజ్బొల్లా స్థావరాలపై ఐడీఎఫ్ బీకర దాడులు
IDF attacks on Hezbollah bases
60మంది మృతి, 50 శాతం ఆయుధ సంపత్తి నష్టం
దాడుల్లో హమాస్ చీఫ్ రావి, ఇద్దరు కమాండర్ల మృతి
రాకెట్ దాడులను సమర్థంగా అడ్డుకుంటున్నాం
ఇరాన్ అణు కేంద్రాలపై దాడులకు ఐడీఎఫ్ సిద్ధం
స్విట్జర్లాండ్ గా పేరొందిన లెబనాన్ లో తీవ్ర విధ్వంసం
మస్నా సరిహద్దులో హిజ్బొల్లాకు ఇరాన్ ఆయుధాల అందజేత
ఇజ్రాయెల్ ఆరోపణలు
జెరూసలెం: లెబనాన్ పై ఇజ్రాయెల్ విరుచుకుపడుతోంది. బుధవారం అర్థరాత్రి నుంచి కొనసాగుతున్న దాడులు గురువారం కూడా కంటిన్యూ చేస్తోంది. భారీ ఎత్తున హిజ్బొల్లా స్థావరాలను ధ్వంసం చేస్తోంది. ఇప్పటికే 50 శాతం హిజ్బొల్లా ఆయుధ సంపత్తిని నష్టం చేశామని ఐడీఎఫ్ స్పష్టం చేసింది. స్థావరాలపై దాడులతో 60 మంది ఉగ్రవాదులను మట్టుబెట్టామని పేర్కొంది. హమాస్ చీఫ్ రావి ముష్తాహా, కమాండర్లు సమేహ్ అల్-సిరాజ్, సమీ ఔదేహ్‌లు మరణించారని ఇజ్రాయెల్ సైన్యం తెలిపింది.
మరోవైపు హిజ్బొల్లా 200 రాకెట్లతో ఇజ్రాయెల్ పై దాడి చేసింది. వీటిని సమర్థంగా అడ్డుకున్నామని ఐడీఎఫ్ ప్రకటించింది. ఇజ్రాయెల్ ఇరాన్ అణు కేంద్రాలపై దాడికి ప్రణాళికలు రచించి సిద్ధంగా ఉందన్న సమాచారం అందడంతో ఇరాన్ హెచ్చరికలు జారీ చేసింది. అలా చేస్తే అదే ఇజ్రాయెల్ కు చివరి రోజు కాగలదని హెచ్చరించింది. ఇంకోవైపు అమెరికా అధ్యక్షుడు జో బైడెన్ మాట్లాడుతూ.. ఉగ్రవాదంపై పోరులో ఇజ్రాయెల్ నేరుగా దాడులు చేయడం సరికాదని అంటూనే క్లిష్టపరిస్థితుల్లో ఇజ్రాయెల్ వెంట నడుస్తామన్నారు.
ఇస్లామిక్ స్విట్జర్లాండ్ గా పేరు పొందిన లెబనాన్ ఇజ్రాయెల్ దాడులతో చాలాభాగం ధ్వంసమవుతోంది. ఇస్లామిక్ దేశాలన్నీ లెబనాన్ ను స్విట్జర్లాండ్ గా వ్యవహరిస్తాయి. అంత ఆర్థికంగా పరిపూర్ణంగా లెబనాన్ ఉంది. అదే సమయంలో హిజ్బొల్లాతో సత్సంబంధాల వల్ల లెబనాన్ అప్రతిష్ఠనూ మూటగట్టుకుంది.
లెబనాన్ సిరియాల మధ్య ఉన్న మస్నా రహదారి ద్వారా ఇరాన్ హిజ్బొల్లా ఉగ్రవాదులకు ఆయుధాలను అందజేస్తున్నట్లు ఇజ్రాయెల్ ఆరోపించింది. ఈ దారిగుండా వేలాది వాహనాలు సిరియాకు చేరుకుంటున్నాయి. ఇదే సమయంలో ఇరాన్ ఆయుధ సంపత్తిని లెబనాన్ కు తరలిస్తున్నారని ఐడీఎఫ్ గుర్తించింది. వీటితోనే హిజ్బొల్లా ఇజ్రాయెల్ పై దాడులకు తెగబడుతోందని చెబుతోంది.
