ఇమ్రాన్​ విడుదల కోరుతు నిరసనలు

ఆందోళనతో అట్టుడుకుతున్న రాజధాని ఇస్లామాబాద్​
ఆందోళనలు అణిచివేయాలి, మానవహక్కులకు భంగం వద్దు: అమెరికా

ఇస్లామాబాద్​: పాక్​ లో వేలాది మంది మాజీ పీఎం ఇమ్రాన్​ ఖాన్​ మద్ధతుదారులు రోడ్లపైకి వచ్చారు. రాజధాని ఇస్లామాబాద్​ లో భారీ నిరసనలు చేపట్టారు. మంగళవారం చేపట్టిన ఈ ఆందోళనలు హింసాత్మకంగా మారాయి. పలుచోట్ల పెద్ద యెత్తున పోలీసుకు, ఆందోళనకారులకు మధ్య హింస చోటు చేసుకుంది. మరోవైపు ఆందోళనలను అణచివేయాలని, అదే సమయంలో మానవహక్కులకు భంగం కలిగించవద్దని అమెరికా పాక్​ కు విజ్ఞప్తి చేసింది. తెహ్రీక్​ ఇ ఇన్సాఫ్​ అధినేత ఇమ్రాన్​ ఖాన్​ ఇచ్చిన పిలుపు మేరకు ఆ పార్టీకి చెందిన వేలాది మంది ఒక్కసారిగా ఇస్లామాబాద్​ లో నిరసనలకు దిగారు. ఆందోళనకారులకు, పోలీసులకు మధ్య జరిగిన దాడుల్లో ఆరుగురు మృతి చెందారు. వందమందికి పైగా పోలీసులకు గాయాలయ్యాయి. ఇమ్రాన్​ ఖాన్​ పాక్​ ప్రభుత్వ తీరును ఎండగడుతూ ‘డూ ఆర్​ డై’ అని జైలు నుంచే ఆందోళనకు పిలుపునిచ్చారు. ఇమ్రాన్​ ఖాన్​ పై 200కు పైగా కేసులు  నమోదయ్యాయి. పాక్​ లో శాంతి నెలకొనాలని అమెరికా విదేశాంగ శాఖ ప్రతినిధి మాథ్యూ మిల్లర్​ ఆకాంక్షిచారు. శాంతియుత ప్రదర్శనలు చేపట్టాలని, ఆందోళనలు, హింసకు తావీయరాదన్నారు. అదే సమయంలో పాక్​ పోలీసులు, ప్రభుత్వం ప్రాథమిక స్వేచ్ఛను గౌరవించాలన్నారు. ఆందోళనల సందర్భంగా 3500మంది ఇమ్రాన్​ మద్ధతుదారులు, నాయకులను పోలీసులు అరెస్టు చేశారు.