హయాతీలో నరమేధం.. 70మంది మృతి

మృతుల్లో 10మంది మహిళలు, ముగ్గురు చిన్నారులు
రాజధానిపై పట్టుకోసమే గ్యాంగ్​ వార్​ లు
దాడి చేసింది గ్రాన్​ గ్రీఫ్​ గ్యాంగ్​ గా గుర్తింపు

పోర్ట్​ ఓ ప్రిన్స్​: కరేబియన్​ దీవి హయాతీలో గ్యాంగ్​ వార్​ లో 70మంది మృతి చెందారు. మృతుల్లో 10మంది మహిళలు ముగ్గురు చిన్నారులు కూడా ఉన్నారని ఐక్యరాజ్యసమితి శనివారం ఆవేదన వ్యక్తం చేసింది. ఈ దేశంలో నానాటికి జీవన పరిస్థితులు మృగ్యం కావడం పట్ల ఆవేదన వ్యక్తం చేసింది. రాజధాని పోర్ట్​ ఓ ప్రిన్స్​ పై ఆధిపత్యం కోసం పలు గ్యాంగ్​ లు ఇలా గ్యాంగ్​ వార్​ లకు పాల్పడుతుంటాయి.

ఇందులో భాగంగానే గురువారం వేకువజామున ఒక్కసారిగా రాజధానికి 60 కిలోమీటర్ల దూరంలోని సొండే పట్టణంలో మరో గ్యాంగ్​ వారిపై భారీ దాడికి పాల్పడ్డాయని యూఎన్​ స్పష్టం చేసింది. ఆకస్మికంగా దాడి చేయడంలో అక్కడ నివసిస్తున్న మూడువేల మంది ప్రాణభయంతో పరుగులు తీశారు. దాడులకు పాల్పడింది గ్రాన్​ గ్రీఫ్​ గ్యాంగ్​ గా గుర్తించారు.

హయాతీలో 150కి పైగా ఇలాంటి గ్యాంగ్​ లు ఉన్నాయి. అన్ని గ్యాంగ్​ లు రాజధానిపై ఆధిపత్యం కోసం పోరాడుతూ.. ఒకరిపై ఒకరు దాడులు చేసుకోవడం పరిపాటిగా మారింది. ఈ దాడుల్లో అమాయక ప్రజల ప్రాణాలు గాలిలో కలిసిపోతున్నాయి. ఇటీవలే ఇక్కడి జైళ్లపై ఈ ముఠాలు దాడికి పాల్పడి అందులో ఉన్న నాలుగువేల మంది గ్యాంగ్​ సభ్యులను విడిపించుకుపోయాయి.

ఈ దేశంలో పరిస్థితులను చక్కదిద్దేందుకు ఐక్యరాజ్యసమితి అంతర్జాతీయ దేశాలకు పిలుపునిచ్చినా ఏ దేశం అక్కడికి తమ సైన్యాన్ని పంపేందుకు ఇష్టపడలేదు.