పాక్​ జాతీయులపై ఇరాన్​ కాల్పులు నలుగురు మృతి

క్వెట్టా: ఇరాన్-పాకిస్థాన్ మధ్య మరోసారి ఉద్రిక్తతలు పెరిగాయి. బుధవారం సాయంత్రం బలూచ్​ ప్రావిన్స్​ మష్కెల్​ సమీపంలో ఇరాన్​ పాక్​ సరిహద్దు వద్ద ఇరాన్​ సైనికులు వాహనంలో వెళుతున్న పాకిస్థానీయులపై కాల్పులకు పాల్పడిందని గురువారం పాక్​ అధికారులు వెల్లడించారు. ఈ కాల్పుల్లో నలుగురు మృతి చెందారని, ఇద్దరికి తీవ్ర గాయాలయ్యాయన్నారు. కాల్పులు ఎందుకు జరిపారన్నది స్పష్టం కాలేదన్నారు. 

ఈ ఘటనతో ఒక్కసారిగా పాక్​ ఉలిక్కిపడింది. ఈ ప్రాంతంలో ఉగ్రవాదులు, స్మగ్లర్లు ఎక్కువగా సంచరిస్తూ ఉంటారు. ఈ నేపథ్యంలో కాల్పులు జరిగాయా? అన్న విషయం తెలియాల్సి ఉంది. కాగా గతంలో కూడా ఇరాన్​ పాక్​ పై క్షిపణి దాడులకు పాల్పడింది. పాక్​ కూడా ఇరాన్​ పై క్షిపణి దాడులకు పాల్పడింది. ఇరాన్​ అధ్యక్షుడు ఇబ్రహీం రైసీ కల్పించుకొని పాక్​ తో చర్చల అనంతరం ఉద్రిక్త వాతావరణాన్ని చల్లార్చగలిగారు. కాగా ఇబ్రహీం రైసీ ఇటీవలే విమాన ప్రమాదంలో దుర్మరణం పాలయ్యారు. మరోమారు పాక్​–ఇరాన్​ మధ్య ఉద్రిక్తతలు పెరిగే అవకాశం లేకపోలేదు.