ట్రైనీ వైద్యురాలి హత్య సమ్మె కొనసాగిస్తున్న ఫోర్డా

కోల్​ కతా: ఆర్జీ కళాశాలలో ట్రైనీ వైద్య విద్యార్థిని హత్య కేసులో విద్యార్థుల ఆందోళన నేపథ్యంలో కళాశాల ప్రిన్సిపల్​  సందీప్​ గోష్​ సోమవారం రాజీనామా సమర్పించారు. కళాశాల ఎదుట (ఫోర్డా) ఫెడరేషన్​ ఆఫ్​ ఆల్​ ఇండియా రెసిడెంట్​ డాక్టర్స్​ అసోసియేషన్​ సమ్మెకు దిగి నిరసన వ్యక్తం చేసింది. ఫోర్డా జనరల్​ సెక్రెటరీ డాక్టర్​ సర్వేషన్​ పాండే మాట్లాడుతూ.. తాము తమ డిమాండ్లను ఆరోగ్య మంత్రిత్వ శాఖ కార్యదర్శికి చెప్పామన్నారు. రాతపూర్వకంగా హామీ ఇచ్చే వరకు సమ్మెను కొనసాగిస్తామన్నారు. వైద్యురాలి హత్యపై సీబీఐ విచారణకు డిమాండ్​ చేశామని తెలిపారు. వైద్యుల భద్రత కోసం కేంద్రం చట్టం తేవాలని పాండే డిమాండ్​ చేశారు. 

కాగా హత్య జరిగిన ఆగస్ట్​ 8వ తేదీన నలుగురు వైద్యులు రాత్రి విధుల్లో ఉన్నారు. వీరందరికీ పోలీసులు సమన్లు జారీ చేశారు. విచారణ కోసం హాజరుకావాలన్నారు. 

మరోవైపు నిందితుడు సంజయ్​ ఆ రోజు మద్యం సేవించాడని, సాక్ష్యాలు, రక్తపు మరకలను తొలగించేందుకు ప్రయత్నించాడని పోలీసులు తెలిపారు. వాటన్నింటినీ స్వాధీనం చేసుకున్నామని బూట్లు, బట్టలపై రక్తపు మరకలు ఉన్నాయని వాటిని ఫోర్సెన్సిక్​ కు పంపామని పోలీసులు తెలిపారు.