సిడ్నీమాల్​ లో దుండగుడి దాడి ఐదుగురి మృతి

సిడ్నీ: సిడ్నీలో ఓ షాపింగ్​ మాల్​ లో దాడి జరిగింది. ఈ దాడిలో ఐదుమంతి మృతిచెందగా పలువురికి తీవ్ర గాయాలయ్యాయి. దీంతో రంగంలోకి దిగిన పోలీసులు వెంటనే ప్రతీదాడికి దిగి ఓ నిందితుడిని మట్టుబెట్టారు. శనివారం ఉదయం ఈ దాడి ఘటన చోటు చేసుకుంది. వెస్ట్​ ఫీల్డ్​ బోండి జంక్షన్​ షాపింగ్​ సెంటర్​ లో ఓ దుండగుడు తుపాకీ, కత్తి చేతబూని పలువురిపై దాడికి పాల్పడ్డాడు. ఈ దాడిలో ఐదుగురు మృతిచెందారు. పలువురికి గాయాలయ్యాయి. గాయపడ్డ వారిలో ఓ మహిళ ఆమె బిడ్డ కూడా ఉన్నారు. ప్రత్యక్ష సాక్షుల ప్రకారం దాడి చేసిన వ్యక్తి మత్తులో ఉన్నట్లుగా కనిపించాడని అన్నారు. అతను దాడులకు పాల్పడుతుండడాన్ని చూసి షాపింగ్​ సెంటర్​ లో పలువురిని అప్రమత్తం చేశామన్నారు. పలువురు అతనిపై చేతికొచ్చిన వస్తువులు విసిరి కొట్టడంతో వెనక్కి పారిపోయేందుకు ప్రయత్నించాడన్నారు. ఈ లోపు పోలీసులు మాల్​ ను చుట్టుముట్టి దుండగుడిని లొంగిపోవాలని హెచ్చరించినా అతను వారిపై కూడా దాడులకు పాల్పడే ప్రయత్నం చేశాడని వెల్లడించారు. దీంతో పోలీసులు అతన్ని షూట్​ చేశారని తెలిపారు. ఈ ఘటనపై సమగ్ర విచారణకు సిడ్నీ ప్రభుత్వం ఆదేశించింది. ఘటనపై తీవ్ర విచారం, సంతాపం వ్యక్తం చేసింది. మరోమారు ఇలాంటి చర్యలు పునరావృతం కాకుండా తీసుకునే చర్యలను సమీక్షిస్తామని పేర్కొంది.