పిడుగుపాటుకు తండ్రికుమారులు మృతి

మెదక్​: మెదక్​ జిల్లాలో పిడుగులు పడి తండ్రి కొడుకులు మృతి చెందారు.  ఆదివారం సాయంత్రం ఉన్నట్లుండి వాతావరణంలో ఒక్కసారిగా మార్పు చోటు చేసుకుంది. వాతావరణం చల్లబడింది. పలు జిల్లాల్లో ఈదురుగాలులు వీయగా, పలు చోట్ల స్వల్ప వర్షాలు పడ్డాయి. మెదక్​ పెద్ద శంకరంపేట మండలం రామోజీ పల్లి లో సాయంత్రం ధాన్యం కొనుగోలు కేంద్రం వద్ద ధాన్యాన్ని ఆరబెట్టుందుకు తండ్రి రాములు (46), విశాల్​ (14)లు ఆరబెడుతున్నారు. ఒక్కసారిగా ఈదురు గాలులతో కూడిన వర్షం రావడంతో చెట్టు కిందకు వెళ్లారు. ఒక్కసారిగా ఆ చెట్టుపై పిడుగు పడింది. రెప్పపాటులో జరిగిన ఈ పరిణామంతో చుట్టుపక్కల తలదాచుకున్నవారు ఒక్కసారిగా హతాశయులయ్యారు. తండ్రి కుమారుల మృతితో గ్రామంలో విషాద ఛాయలు అలముకున్నాయి. కాగా వీరి మృతికి కొనుగోలు కేంద్రాల అధికారులే బాధ్యత వహించాలని రైతులు ఆందోళన వ్యక్తం చేస్తున్నారు. కొనుగోలు కేంద్రాల వద్ద సరైన సౌకర్యాలు లేకపోవడంతోనే ఈ ప్రమాదం చోటు చేసుకుందని మండిపడ్డారు.  మరోవైపు ఆదిలాబాద్​ లో కూడా వర్షం కురిసింది. జైనత్​, బేల మండలాల్లో ఈదురు గాలులతో కూడిన వర్షంపడింది. జైనత్​ మండలం గిమ్మలో పిడుగు పడి ఐదుగురికి తీవ్ర గాయాలయ్యాయి. గాయపడిన వారిని ఆదిలాబాద్​ రిమ్స్​ ఆసుపత్రికి తరలించి చికిత్సనందింప చేస్తున్నారు.