జమ్మూకశ్మీర్, హరియాణాలో మోగిన ఎన్నికల నగారా
జమ్మూకశ్మీర్ లో మూడు విడతల్లో ఎన్నికలు హరియాణాలో ఒకే విడతలో ఎన్నికలు అక్టోబర్ 4న ఎన్నికల ఫలితాలు
నా తెలంగాణ, న్యూ ఢిల్లీ: జమ్మూకశ్మీర్, హరియాణా ఎన్నికల నగారా మోగింది. జమ్మూకశ్మీర్ లో మూడు విడతల్లో 90 స్థానాలకు ఎన్నికలను నిర్వహించనుండగా, హరియాణాలో ఒకే విడతలో 90 స్థానాలకు ఎన్నికలు నిర్వహించనున్నట్లు కేంద్ర ఎన్నికల ప్రధాన కమిషనర్ రాజీవ్ కుమార్ తెలిపారు. శుక్రవారం ఆయన ఎన్నికలకు సంబంధించి ఈసీ ప్రధాన కార్యాలయంలో మీడియా సమావేశం నిర్వహించారు. హరియాణా, జమ్మూకశ్మీర్ ఎన్నికల తేదీలను, వివరాలను ప్రకటించారు.
జమ్మూకశ్మీర్: 18 సెప్టెంబర్ 24 స్థానాలు, 25 సెప్టెంబర్ 26 స్థానాలు, 1 అక్టోబర్ 40 స్థానాలలో మూడు విడతల్లో ఎన్నికలు నిర్వహించనున్నట్లు ప్రకటించారు. మొత్తం 90 స్థానాలలో ఎన్నికలను నిర్వహిస్తామన్నారు. ఆగస్ట్ 20న తుది ఓటర్ల జాబితాను విడుదల చేయనున్నారు. 4 అక్టోబర్ ఓట్ల లెక్కింపు జరుగుతుందన్నారు. ఎన్నికల నిర్వహణ కోసం 11,838 పోలింగ్ బూత్ లను ఏర్పాటు చేయనుండగా, 360 మోడల్ పోలింగ్ బూత్ లను ఏర్పాటు చేయనున్నారు. జమ్మూకశ్మీర్ లో 87.09 లక్షల మంది ఓటర్లుండగా, 20 లక్షల మందికిపైగా యువత ఉన్నారు.
నోటిఫికేషన్..
ఫేజ్–1 ఫేజ్–2 ఫేజ్–3
సీట్లు 24 26 40
నోటిఫికేషన్ 20 ఆగస్ట్ 29 ఆగస్ట్ 5 సెప్టెంబర్
నామినేషన్ 27 ఆగస్ట్ 5 సెప్టెంబర్ 12 సెప్టెంబర్
నా.పరిశీలన 28 ఆగస్ట్ 6 సెప్టెంబర్ 13 సెప్టెంబర్
నా.ఉపసంహరణ 30 ఆగస్ట్ 9 సెప్టెంబర్ 17 సెప్టెంబర్
ఒటింగ్ 18 సెప్టెంబర్ 25 సెప్టెంబర్ 1 అక్టోబర్
హరియాణా: హరియాణాలో మొత్తం 90 స్థానాలుండగా 1 అక్టోబర్ న ఒకే విడతలో ఓటింగ్ నిర్వహించనున్నారు. 4 అక్టోబర్ న ఓట్ల లెక్కింపు జరగనుంది. 2.1 కోట్లకు పైగా ఓటర్లున్నారు. 90 సీట్లకు గాను 73 సీట్లు జనరల్ కు కేటాయించారు. ఆగస్ట్ 27న తుది ఓటరు జాబితాను విడుదల చేయనున్నారు. 20,269 పోలింగ్ బూత్ లు ఏర్పాటు చేయనుండగా ఇందులో 150 మోడల్ పోలింగ్ బూత్ లు ఉండనున్నాయి.
నోటిఫికేషన్..
90 స్థానాలకు గాను 5 సెప్టెంబర్ న నోటిఫికేషన్ వెలువడనుంది. 12 సెప్టెంబర్ వరకు నామినేషన్ల స్వీకరణ, 13 సెప్టెంబర్ న నామినేషన్ల పరిశీలన, నామినేషన్ల ఉపసంహరణ 16 సెప్టెంబర్, అక్టోబర్ 1న ఓటింగ్ నిర్వహించనున్నారు.
రెండు ప్రాంతాలకు సంబంధించి అక్టోబర్ 4న ఓట్ల లెక్కింపు చేపట్టి ఎన్నికల ఫలితాలను వెల్లడించనున్నారు.
రాజీవ్ కుమార్..
మీడియా సమావేశంలో కేంద్ర ఎన్నికల ప్రధాన కమిషనర్ రాజీవ్ కుమార్ మాట్లాడుతూ.. అమర్ నాథ్ యాత్ర ముగింపు, వర్షాలు ఎక్కువగా ఉండడంతో ఎన్నికల నిర్వహణకు వేచి ఉన్నామని తెలిపారు. అడ్డంకుల తొలగింపుతో ఎన్నికల నిర్వహణను ప్రకటించామని తెలిపారు. మహారాష్ర్టలో పర్వదినాలు ఉన్న నేపథ్యంలో ఎన్నికలపై ఇంకా నిర్ణయం తీసుకోలేదని రాజీవ్ కుమార్ తెలిపారు. జమ్మూకశ్మీర్ లో ఎన్నికల కోసం అన్ని పార్టీల విజ్ఞప్తుల కూడా పరిశీలించామన్నారు. ప్రజలంతా తమ ప్రాంతంలో ఎన్నికలు జరగాలని కోరుకుంటున్నారని, ముఖ చిత్రాన్ని మార్చే రోజు కోసం ఎంతో ఉత్సాహంగా ఎన్నికల్లో పాల్గొనేందుకు ఎదురు చూస్తున్నారని అన్నారు. ఓటింగ్ కేంద్రాల్లో అన్ని రకాల సౌకర్యాలను కల్పిస్తున్నట్లు తెలిపారు. నీరు, విద్యుత్, మరుగుదొడ్లు, దివ్యాంగ ఓటర్లకు వీల్ చైర్ ల సౌకర్యం కల్పిస్తామన్నారు. నిర్భయంగా అందరూ ఓటింగ్ లో పాల్గొనాలని రాజీవ్ కుమార్ విజ్ఞప్తి చేశారు.
