కీలక భాగస్వామ్యంపై చర్చలు
యూఏఈకి వెళ్లిన విదేశాంగ శాఖ మంత్రి ఎస్. జై శంకర్
నా తెలంగాణ, న్యూ ఢిల్లీ: భారత్–యూఏఈ మధ్య భాగస్వామ్యానికి సంబంధించిన పలు అంశాలపై చర్చించేందుకు విదేశాంగ శాఖ మంత్రి ఎస్.జైశంకర్ ఆదివారం యూఏఈ వెళ్లారు. ఈ పర్యటనలో ఆయన అబ్దుల్లా బిన్ జాయెద్ అల్ నహ్యాన్ తో కీలక చర్చలు జరపనున్నారు. ద్వైపాక్షిక అంశాలతోపాటు గాజాలోని ప్రస్తుత పరిస్థితులపై కూడా చర్చలు జరిగే అవకాశం ఉందని భావిస్తున్నారు. కాగా యూఏఈ భారత్ మధ్య ఇప్పటికే అనేక విషయాల్లో భాగస్వామ్యాలు బలోపేతంగా ఉన్నాయి. ఇరుదేశాల సంబంధాలు మరింత మెరుగ్గా ఉండాలని భారత్ ప్రయత్నిస్తోంది. ఆర్థిక భాగస్వామ్యాన్ని పెంచేందుకు 2022లో ఇరుదేశాలు ఆర్థిక భాగస్వామ్య ఒప్పందం (సెపా–సీఈపీఏ)పై సంతకాలు కూడా చేశాయి. మరోవైపు ప్రధాని నరేంద్ర మోదీ కూడా అతి త్వరలో యూఏఈలో పర్యటించనున్నట్లు తెలుస్తోంది.
