క్రిప్టో డేంజరే!

వాషింగ్టన్​ డీసీ: ఆర్థిక స్థిరత్వానికి క్రిప్టో కరెన్సీ భారీ ప్రమాదాన్ని తీసుకువచ్చే అవకాశం ఉందని, ఒక్కసారిగా ఆర్థిక వ్యవస్థలూ కుప్పకూలే ప్రమాదం లేకపోలేదని ఆర్బీఐ గవర్నర్​ శక్తికాంతదాస్​ అన్నారు. శనివారం అమెరికా వాషింగ్టన్​ డీసీలో పీఐఐఈ నిర్వహించిన మాక్రో వీక్​–2024లో శక్తికాంతదాస్​ తన అభిప్రాయాలను పంచుకున్నారు. దీంతో సెంట్రల్​ బ్యాంక్​ నియంత్రణ కోల్పోయే పరిస్థితి ఉందన్నారు.  ఆర్థిక వ్యవస్థపై క్రిప్టో కరెన్సీ ఆధిపత్యం చెలాయించేందుకు అనుమతించవద్దని తాను భావిస్తున్నట్లు దాస్​ తెలిపారు. బ్యాంకింగ్​ వ్యవస్థకు ముప్పు అన్నారు. బ్యాంకులు నియంత్రణ కోల్పోతే, సాంకేతికంగా నగదు ఎలా తనిఖీ చేయాలన్నది ప్రశ్నార్థకంగా మారుతుందని చెప్పారు. సంక్షోభ సమయాల్లో ద్రవ్య సరఫరాను నియంత్రించడం ద్వారానే సెంట్రల్​ బ్యాంక్​ ద్రవ్యోల్బణాన్ని నియంత్రిస్తుందని అన్నారు. తమ దృష్టిలో క్రిప్టో కరెన్సీ పెద్ద ప్రమాదమే అని శక్తికాంతదాస్​ స్పష్టం చేశారు.