ఐక్యతను విచ్ఛిన్నం చేసే వ్యాఖ్యలా? రాహుల్​ పై కేంద్రమంత్రి జి.కిషన్​ రెడ్డి మండిపాటు

నా తెలంగాణ, హైదరాబాద్​: భారత ప్రజలు, విధానంపై రాహుల్​ గాంధీ విదేశాల్లో చేసిన వ్యాఖ్యలను తెలంగాణ రాష్ర్ట బీజేపీ అధ్యక్షుడు, కేంద్ర బొగ్గు, గనుల శాఖ మంత్రి జి.కిషన్​ రెడ్డి తీవ్రంగా తప్పుబట్టారు. మంగళవారం సామాజిక మాధ్యమం వేదికగా ఆయనపై ఫైర్​ అయ్యారు. ఎప్పుడూ ఆర్​ఎస్​ఎస్​ లాంటి సంస్థలే లక్ష్యంగా చేసుకునే రాహుల్​ గాంధీ భిన్నత్వంలో ఏకత్వమైన భారత ఐక్యతను దెబ్బతీస్తున్నారని మండిపడ్డారు. సంరక్షించే వారినే అసహ్యించుకోవడం ఆయనకు పరిపాటిగా మారిందని ఆగ్రహం వ్యక్తం చేశారు. విభజనే అతని ఏజెండాగా వ్యాఖ్యలు చేయడం దురదృష్టకరమని కిషన్​ రెడ్డి మండిపడ్డారు. ఓ వైపు జమ్మూకశ్మీర్​ ఎన్నికల్లో ఎన్సీతో పొత్తుపెట్టుకొని లేనిపోని ఆరోపణలు చేస్తూ దేశ ఐక్యతను విచ్ఛిన్నం చేసే ప్రయత్నాలు చేస్తున్నారని అన్నారు. సిక్కుల మారణాకాండ, దళిత రిజర్వేషన్లు, ఆర్టికల్​ 370 రద్దు లాంటి సున్నిత అంశాలపై దేశ ప్రజలను తప్పుదోవ పట్టించేలా వ్యవహరించడాన్ని ఖండించారు. రాహుల్​ గాంధీ విభజన ఏజెండాకు భారత్​ లో స్థానం లేదని జి.కిషన్​ రెడ్డి పేర్కొన్నారు.