విదేశాల్లో రాహుల్ వ్యాఖ్యలు కేసు నమోదు చేస్తాం
చట్టపరంగా పోరాటం కేంద్రమంత్రి హర్దీప్ సింగ్ పూరీ ఆగ్రహం
నా తెలంగాణ, న్యూ ఢిల్లీ: సిక్కులపై రాహుల్ గాంధీ వ్యాఖ్యలపై కేంద్ర మంత్రి హర్దీప్ సింగ్ పూరీ తీవ్ర అభ్యంతరం వ్యక్తం చేశారు. ఆయనపై మండిపడ్డారు. కాంగ్రెస్ పార్టీ ఆధ్వర్యంలోనే పక్కా ప్రణాళికతోనే ఊచకోత జరిగిందని పూరీ ఆరోపించారు. ఇందుకు రాహుల్ గాంధీపై చట్టపరమైన పోరాటం కొనసాగిస్తామని, కేసు నమోదు చేస్తామని పూరీ స్పష్టం చేశారు.
మంగళవారం న్యూ ఢిల్లీ బీజేపీ కార్యాలయంలో విలేకరుల సమావేశంలో మాట్లాడారు. రాహుల్ గాంధీ సిక్కుల ఊచకోత అంశం ప్రస్తావనపై మాట్లాడుతూ.. ఆయన తన తప్పును అంగీకరించకుండా ఇతరులపై ప్రశ్నలు సంధిస్తున్నారని అన్నారు. విదేశీ పర్యటనలో రాహుల్ దేశ పరువు తీసేందుకు ప్రయత్నిస్తున్నారని మండిపడ్డారు. మోదీ నేతృత్వంలోని కేంద్ర ప్రభుత్వం సిక్కుల క్షేమం కోసం అనేక అభివృద్ధి, సంక్షేమ ఫలాలను అందించిందన్నారు. కర్తార్ పూర్ కారిడార్ ప్రారంభం సిక్కుల గౌరవాన్ని పెంచిందన్నారు. రాహుల్ విద్వేష దుష్ప్రచారాలు మానుకోవాలన్నారు. ఈ ప్రకటనపై కోర్టుకు వెళతామని తెలిపారు. ప్రతిపక్ష నేతగా ఉన్న ఆయన ఇలాంటి వ్యాఖ్యలు చేయడం సమంజసం అనిపించుకోవని పూరీ అన్నారు. ఇప్పటికైనా రాహుల్ ఇలాంటి వ్యాఖ్యలకు దూరంగా ఉండాలన్నారు. గురుద్వారాలలో లంగర్ పై పన్నును మాఫీ చేసింది మోదీ ప్రభుత్వమని గుర్తు చేశారు. అనేకమార్లు సిక్కుల దేవాలయాలను సందర్శించిన మోదీ తమ మతానికి పూర్తి గౌరవం ఇచ్చారని, భక్తి ప్రవత్తులతో మెలిగారని హర్దీప్ సింగ్ పూరీ స్పష్టం చేశారు.
